Vuçiq i quan “përrallë” kushtet e Kurtit për Asociacionin

Presidenti i Serbisë, Aleksandar Vuçiq, i ka quajtur “përrallë” gjashtë kushtet e kryeministrit të Kosovës, Albin Kurti, për formimin e Asociacionit të komunave me shumicë serbe.

Në seancën e Kuvendit të Kosovës, të enjten Kurti numëroi gjashtë kushtet që të pranojë themelimin e Asociacionit. Kushtet që përmendi ishin që Asociacioni të jetë në përputhje me Kushtetutën, të ndërrojë emrin, të mos jetë monoetnik, të mos ketë kompetenca ekzekutive, të drejtat e pakicave të kenë parimin e reciprocitetit, të shuhen strukturat ilegale të Serbisë, që Asociacioni të jetë pjesë e marrëveshjes finale e të zbatohet pas njohjes e që Serbia t’i tërheqë letrat dërguar shteteve mosnjohëse në BE për të kundërshtuar aplikimin e Kosovës për anëtarësim në Bashkimin Evropian.

Siç ka shkruar Radio Evropa e Lirë, Vuçiqi i ka komentuar menjëherë kushtet e Kurtit, duke i quajtur “përrallë”.

Në seancën e Kuvendit të Serbisë gjatë diskutimeve për Kosovën, Vuçiqi ka thënë se “Kurti në fakt nuk do ta formojë Asociacionin”./REL