Vrapuesit kërkojnë rregullimin e shtegut të dëmtuar në Tokbashqe

Vrapimin dhe ecjen e shpejtë qytetarë të shumtë preferojnë ta bëjnë në Tokbashqe, pasi është i vetmi park që e ka shtegun prej gome.

Megjithatë, as ky shteg nuk po i plotëson kushtet e duhura për vrapim pasi është dëmtuar shumë.

Që nga ndërtimi i tij para 10 vjetësh, nuk është intervenuar asnjëherë më në të.

Qytetarët kërkojnë investim edhe në këtë park, pasi Komunës së Prishtinës po i teprojnë çdo vit dhjetëra-miliona euro.

Ka qytetarë që po ankohen se nuk kanë hapësirë për të vrapuar, pasi ky shteg po shfrytëzohet edhe nga çiklistët, por edhe për shëtitje.

Por, kjo rrugë e vrapimit nuk pritet të rregullohet në kohë të shkurtër.

Drejtori i Sportit në Komunën e Prishtinës, Fitim Rexha, thotë se janë në garën e dërgimit për tenderim, por nuk ka dhënë ndonjë afat se kur do të bëhet kjo.

Por, më afër realizimit është një shteg i ngjashëm në lagjen Arbëria.

“Ka kaluar në tenderim një shteg i ngjashëm me atë të Tokbashqes që do të ndërtohet në Arbëri, është në fazën e fillimit të kontratës dhe shumë shpejt pritet të nënshkruhet. Është i ngjashëm me atë të Tokbashqes dhe shpresojmë që do t’i plotësojë nevojat e qytetarëve të Arbërisë, Kodrës së Trimave dhe të Xhamisë së Llapit”, tha Rexha.

Përveç Tokbashqes, qytetarët mund të shfrytëzojnë për vrapim edhe Parkun e Gërmisë, mirëpo, i njëjti nuk ka një shteg të rregulluar përveç shtegut malor.