Vonohet vaksina kundër gripit sezonal, vjen në mes të nëntorit

Pandemia dhe kërkesat e mëdha të shumë vendeve të botës për sigurimin e vaksinës kundër gripit sezonal kanë bërë që as Kosova të mos arrijë ta sigurojë me kohë këtë vaksinë.

Ndonëse disa herë deri më tani ishte paralajmëruar se vaksinimi sidomos i grupeve të rrezikuara do të nisë në tetor, organizata e cila merret me sigurimin e kësaj vaksine ka bërë të ditur se ajo në Kosovë nuk mund të arrijë më herët se mesi i muajit nëntor.

Zyrtarë të UNICEF-it në Kosovë thonë se kanë siguruar mbi 160 mijë doza të vaksinës, por shkaku i pandemisë transportimi është bërë më i vështirë, raporton KOHA.

“Këtë vit, duke e pasur parasysh gjendjen në të cilën jemi, UNICEF-i ka arritur të ngrejë për 50% numrin e vaksinave me ç’rast i presim 160.500 doza të vaksinave të arrijnë në Kosovë. Duke e pasur parasysh që globalisht për shkak të pandemisë, logjistika është bërë më e vështirë, pritet që vaksinat të arrijnë në Kosovë në mesin e nëntorit, por mund të këtë ndonjë vonesë eventuale duke pasur parasysh kërkesat e shumta globale”, ka thënë UNICEF-i.

Anëtarë të Komisionit për Shëndetësi thonë se institucionet është dashur të jenë më të përgatitura për sigurimin e kësaj vaksine, kur kihet parasysh mbrojtja që mund t’i jepet popullatës përmes kësaj vaksine në kohë të pandemisë.

“Realisht për shkak të situatës me pandemi është më se e domosdoshme që vaksina të sigurohet me kohë, por edhe para kohës që të kemi një mbrojtje të popullatës në rrezikun që mund të ndodhë gjatë muajve e dhe ditëve në vijim, sepse pacientët sidomos me mosha të shtyra potencialisht janë më të rrezikuar në aspektin e mbrojtjes shëndetësore do të ishte një ndihmesë e madhe për ta dhe institucionet tona do të duhej të ishin më të përgatitura për këtë fazë”, ka thënë Bekim Haxhiu nga PDK-ja.

Edhe Arbëri 11 tet 2021 Vaksinat kundër gripit sezonal pritet të vijnë në fund të tetorit

Derisa ministri Armend Zemaj nuk ka mundur të japë një afat se kur do të mund të nisë vaksinimi kundër gripit sezonal derisa ka pranuar se ka vonesa.

“MSH-ja me kërkese të IKSHPK-së ka përfunduar procedurën e prokurimit kundër gripit sezonal në marrëveshje me UNICEF-in. Fillimisht janë siguruar rreth 120 mijë vaksina e më pas edhe 4.500. Në total, 160 e 500 mijë vaksina. Ndërsa, MSH-ja është në proces të tenderimit edhe të 250 mijë vaksinave nga buxheti i saj. Problemi i sigurimit është akoma evident duke marrë parasysh edhe kërkesat e mëdha në tregun botëror dhe rezervat, por edhe ndryshimi i situatës epidemiologjike dhe kërkesat që të shtrihet vaksinimi në grupe të tjera”, është shprehur Zemaj.

Deri më tani Kosova vaksinën kundër gripit sezonal e ka siguruar përmes UNICEF-it, ndërsa këtë vit në shtator MSH-ja ka hapur tenderin për të siguruar edhe rreth 400 mijë vaksina të tjera, por që ky tender është anuluar për shkak të tejkalimit të çmimit.