Kurti: KE-ja të dorëzojë pyetësorin për anëtarësim dhe dhënien e statusit të vendit kandidat për Kosovën
Kryeministri në detyrë, Albin Kurti, në takim me presidenten e Komisionit Evropian, Ursula von der Leyen ka ritheksuar nevojën që Komisioni Evropian të dorëzojë sa më parë pyetësorin për anëtarësim dhe dhënien e statusit të vendit kandidat për anëtarësim në Bashkimin Evropian për Kosovën.
Në një komunikatë për media të Zyrës së Kryeministrit, thuhet se Kurti ka shprehur mirënjohjen për angazhimin dhe mbështetjen e vazhdueshme të Von der Leyenit për rrugëtimin evropian të Kosovës.
“Gjatë takimit u diskutua për thellimin e marrëdhënieve ndërmjet Kosovës dhe BE-së, reformat dhe progresin tonë në sundim të ligjit dhe fushën e sigurisë, përparimin demokratik dhe rritjen ekonomike. Kryeministri ritheksoi nevojën që Komisioni Evropian të dorëzojë sa më parë pyetësorin për anëtarësim dhe dhënien e statusit të vendit kandidat për Kosovën”, thuhet në komunikatë.
Kurti thuhet se ka folur edhe për zhvillimin e zgjedhjeve lokale të mbajtura të dielën e kaluar, të cilat sipas tij, ishin të lira, demokratike dhe në përputhje me standardet më të mira evropiane. “Theksoi rëndësinë për një tranzicion të rregullt të pushtetit në komunat ku do të ketë ndërrim të qeverisjes, në respektim të plotë të kushtetutës dhe ligjeve të Republikës së Kosovës si dhe përkushtimin e qeverisë për të mbrojtur proceset demokratike nga çdo ndërhyrje e jashtme”, thuhet në komunikatë.
Për të forcuar bashkëpunimin ekonomik me BE-në në kuadër të iniciativës “Single Market Highway” kryeministri në detyrë thuhet se i ka dorëzuar Von der Leyenit tri letra zyrtare me interesin e Kosovës për të nisur dialogun strategjik në tre sektorë kyç, bujqësi, teknologji të informacionit dhe komunikimit (TIK), si dhe industri të mbrojtjes, fusha ku thuhet se Kosova sheh avantazh krahasues dhe potencial të lartë zhvillimi.
Tri porositë e Von der Leyenit në Kosovë
Photo: Driton Paçarada
Presidentja e Komisionit Evropian, Ursula von Der Leyen, ka shkruar tri porosi në X pas takimeve që ka mbajtur në Prishtinë me presidenten Vjosa Osmani e kryeministrin në detyrë, Albin Kurti.
Ajo ka thënë se Bashkimi Evropian është i përkushtuar për një të ardhme në të cilën “të gjithë partnerët e Ballkanit Perëndimor janë pjesë e Bashkimit”.
“Për këtë, është e rëndësishme që Kosova të vazhdojë ndërtimin e institucioneve të sigurta. Të depërshkallëzojë tensionet në shtet. Dhe po ashtu, Kosova duhet t’i finalizojë hapat e domosdoshëm për të përfituar nga Plani i Rritjes”, ka shkruar ajo.
Plani i Rritjes është pako për Ballkanin Perëndimor. Kosova nuk mund të përfitojë nga kjo pako për shkak të moskonstituimit të institucioneve.
Ky plan është instrument financiar me vlerë 6 miliardë euro për periudhën 2024-2027, i cili synon integrimin gradual të vendeve të rajonit në tregun e përbashkët të BE-së.
Kosova nga Plani i Rritjes pritet të përfitojë rreth 880 milionë euro.
Osmani: Me Von der Leyenin diskutuam për heqjen e masave të padrejta ndaj Kosovës
Photo: Driton Paçarada
Presidentja e Kosovës, Vjosa Osmani, pas takimit me presidenten e Komisionit Evropian, Ursula von der Leyen, ka thënë se Kosova është gati të ecë përpara me përkushtim, me reforma të suksesshme dhe me besim të palëkundur në të ardhmen evropiane.
Përmes një postimi në Facebook ka shkruar se me von der Leyen, ndër të tjera, kanë diskutuar edhe për zbatimin e Planit të Rritjes dhe heqjen e masave ndaj Kosovës.
“Kënaqësi e veçantë ta mirëpres sërish sot në Republikën e Kosovës Presidenten e Komisionit Evropian, Ursula von der Leyen. Së bashku diskutuam për zbatimin e Planit të Rritjes, për rëndësinë e heqjes së masave të padrejta ndaj vendit tonë, si dhe për hapat tutje në rrugën drejt integrimit tonë në Bashkimin Evropian. Mbështetja e Komisionit Evropian për Kosovën në këtë proces mbetet thelbësore”, ka shkruar ajo.
Gërvalla: Vizita e Von der Leyenit vjen në momentin kur Kosova po konsolidon reformat
Ministrja në detyrë e Punëve të Jashtme dhe Diasporës, Donika Gërvalla, ka mirëpritur në Aeroportin Ndërkombëtar të Prishtinës “Adem Jashari” presidenten e Komisionit Evropian, Ursula von der Leyen, e cila po zhvillon vizitë zyrtare në Kosovë, ku ka takuar presidenten Vjosa Osmani e kryeministrin në detyrë Albin Kurti.
Në një postim në rrjete sociale të mërkurën, Gërvalla ka shkruar se kishte nderin ta mirëpriste presidenten e Komisionit Evropian, duke theksuar rëndësinë e kësaj vizite në një periudhë kur Kosova po konsolidon reformat dhe forcon sundimin e ligjit.
“Mirë se vini në Republikën e Kosovës, Ursula von der Leyen. Vizita e saj në Prishtinë vjen në një moment kur Kosova po konsolidon reformat, forcon sundimin e ligjit dhe thellon përafrimin me standardet e BE-së”, ka shkruar Gërvalla.
Ajo ka shtuar se Kosova mbetet partnere e besueshme e Bashkimit Evropian, duke theksuar bashkëpunimin e ngushtë me Komisionin Evropian në zbatimin e Planit të Rritjes për Ballkanin Perëndimor, programit IPA III dhe qasjen graduale në tregun e përbashkët evropian.
“Po punojmë ngushtë me Komisionin Evropian për zbatimin e Planit të Rritjes për Ballkanin Perëndimor, programit IPA III dhe hapat e qasjes graduale në tregun e përbashkët, me rezultate të matshme për qytetarët tanë, duke afruar edhe më tej integrimin tonë evropian”, ka theksuar ministrja në detyrë.
Von der Leyen takon Kurtin në Kuvend
Photo: Driton Paçarada
Pas takimit me presidenten Vjosa Osmani, presidentja e Komisionit Evropian, Ursula von der Leyen, është pritur në takim nga kryeministri Albin Kurti.
Takimi Von der Leyen-Kurti po zhvillohet në hapësirat e Kuvendit të Kosovës dhe ka nisur nga ora 14:05 ashtu siç ishte paralajmëruar nga Zyra e Kryeministrit.
Mediat janë lejuar të marrin vetëm pamje para fillimit të takimit, teksa nuk dihet nëse do të ketë konferencë për shtyp pas përfundimit të tij.
Von der Leyen ka arritur në Prishtinë pas vizitës së saj në Beograd, ku është takuar me presidentin serb Aleksandar Vuçiq.
Von der Leyen takon Osmanin
Photo: Driton Paçarada
Presidentja e Komisionit Evropian, Ursula von der Leyen, është pritur në takim nga presidentja e vendit, Vjosa Osmani.
Pas vizitës së saj në Beograd, ku është takuar me presidentin serb Aleksandar Vuçiq, Von der Leyen ka arritur në Prishtinë, ku do të takojë krerët shtetërorë në orët e pasdites.
Mediat janë lejuar të marrin vetëm pamje para se të fillojë takimi, teksa nuk dihet nëse do të ketë adresim për media.
Pas Osmanit, Von der Leyen do të pritet edhe nga kryeministri Albin Kurti në hapësira e Kuvendit të Kosovës nga ora 14:05.
Kurti do ta presë Von der Leyenin në hapësirat e Kuvendit
Presidentja e Komisionit Evropian, Ursula von der Leyen, do ta takojë kryeministrin në detyrë, Albin Kurti, në hapësirat e Kuvendit të Kosovës.
Në njoftimin e lëshuar nga Zyra e Kryeministrit nuk është bërë e ditur se pse ky takim nuk do të zhvillohet në objektin e Qeverisë.
Por në gusht ambasadori i BE-së në Kosovë, Aivo Orav, e pati informuar Qeverinë në detyrë se zyrtarët e bllokut evropian nuk do të takohen në ndërtesat qeveritare derisa ekzekutivi të jetë me mandat të plotë. Në letrën e tij, ishte thënë se vendimi është marrë pas aktgjykimit të Gjykatës Supreme në fund të qershorit, që pati hedhur poshtë një vendim të ministrit në detyrë të Financave, Hekuran Murati, duke konstatuar se nxjerrja e akteve nënligjore apo udhëzimeve administrative nga ministrat që janë deputetë është e kundërligjshme dhe shkel dispozitat kushtetuese.
KOHA ka dërguar pyetje në ZKM për sqarime, por ende nuk ka marrë përgjigje.
Takimi do të mbahet nga ora 14:05.