Vazhdojnë përplasjet mes Komunës dhe opozitës në Lipjan, shkaku i “kontratave pa zotim të mjeteve”

Gjatë ditës, PDK-ja dega në Lipjan nëpërmjet një komunikate ka akuzuar qeverisjen e LDK-së me arsyetim se e ka zhytur komunën në borxhe prej 4.5 milionë eurosh, duke lidhur kontrata me operatorë ekonomikë pa zotim të mjeteve.

Ndërkohë, Komuna e Lipjanit nëpërmjet një komunikate ka sqaruar se deri tash nuk është lidhur asnjë kontratë pa zotim të mjeteve.

“Kontratat e lidhura nuk mund të paguhen pa u kryer punimet. Detyrimet kontraktuale nuk janë borxhe deri sa nuk përfundojnë punimet. Komuna ka kontrata të lidhura për projekte në infrastrukturë siç janë: Asfaltimet e rrugicave në fshatra të ndryshme, ndërtimin e fushave sportive, palestra sportive, objekti ri i komunës etj. Ka kontrata për shërbime të mirëmbajtjes dhe të tjera të cilat mundet të shpenzohen vetëm kur përfundojnë punimet”, thuhet midis të tjerash në komunikatën e Komunës së Lipjanit.

Sipas tyre, tendenca për t’i i paraqitur kontratat e lidhura si borxhe të komunës është tendencë për të barazuar keq menaxhimin e të kaluarës të buxhetit komunal me menaxhimin e tanishëm për të cilin nga Raporti i Auditorit të Jashtëm merr vlerësimin dhe kualifikimin më të mirën të mundshëm me kualifikim të pamodifikuar. “Të vetmet borxhe Komuna i ka akoma ato që janë të trashëguara nga ish pushteti”, thuhet në reagim.

Lexo edhe: https://www.koha.net/kosove/240578/opozita-akuzon-ekzekutivin-e-lipjanit-per-kontrata-pa-zotim-te-mjeteve/