Qeveria në detyrë ka vendosur të pezullojë procedurat e prokurimit për blerjen e vaksinave anti-COVID.
Me kërkesë të Ministrisë së Shëndetësisë, Qeveria ka përgatitur një propozim-vendim, ku thotë “se aprovohet kërkesa e MSH-së për përjashtimin e nenit 3 të Ligjit për prokurimin publik të Kosovës për negocimin e kontratës për vaksina anti-COVID”.
Propozim-vendimi pritet të marrë miratimin e Qeverisë sonte, në mbledhjen që po mbahet online.
Me këtë, i hapet rrugë Qeverisë të negociojë blerjen e vaksinave pa procedura prokurimi, por edhe dëshmon se deri më tash nuk është kontraktuar sasia e vaksinave të paralajmëruara nga Qeveria, meqë ende nuk është vendosur për përjashtim të procedurës së prokurimit.
“Tashmë, të gjitha përgatitjet për pranimin dhe administrimin e vaksinës janë bërë nga institucionet relevante duke u bazuar në planin shtetëror për imunizim kundër COVID-19. Prioriteti ynë është të fillohet të vaksinohen të gjitha grupet vulnerabile sa më shpejt që të jetë e mundur, duke zvogëluar shtrimet në spital dhe mbingarkesën e spitaleve, që po krijojnë një presion të madh mbi sistemin shëndetësor. Prandaj, është jetike që të sigurohen vaksina të sigurta dhe efektive sa më shpejt të jetë e mundur dhe në sasi të mjaftueshme që të fillojmë vaksinimin edhe në vendin tonë. Andaj, bazuar në këtë, Ministria e Shëndetësisë kërkon nga Sekretariati Koordinues i Qeverisë përfshirjen në rendin e ditës për mbledhjen e Qeverisë së Republikës së Kosovës aprovimin e propozim vendimit të Ministrisë së Shëndetësisë duke përjashtuar nenit 3 të Ligjit nr. 04/l-042 për prokurimin publik në Republikën e Kosovës për negocimin e kontratës për vaksina COVID – 19”, thuhet në arsyetimin e MSH-së, bashkëngjitur kërkesës për pezullim të ligjit për prokurimin publik, mëson KOHA.
Edhe
Nga nesër, vaksinimi kundër COVID-19 pa terminë
Qeveria Hoti më herët ka thënë se ka siguruar 535 mijë vaksina nga kompania Pfizer, 600 mijë përmes Austrisë dhe 720 mijë përmes programit COVAX.
Ka thënë se kontingjenti i parë do të vijë në shkurt, por nuk ka dhënë datë.
