Ujësjellësi Rajonal “Prishtina” ka paralajmëruar të premten banorët që furnizohen me ujë përmes tij që të kenë kujdes gjatë vendosjes së ujëmatësve në pronat e tyre, duke mos i lënë të ekspozuar direkt ndaj të ftohtit, pasi siç thuhet, mund të ngrihen.
Përmes një komunikate për media, Ujësjellësi ka thënë se konsumatorët janë vetë përgjegjës për mbrojtjen e tubave të ujit dhe të ujëmatësve nga ajri i ftohtë dhe era/
“Parandalimi i ngrirjes së ujëmatësve dhe tubave që mos të vijë deri te ngrirja është shumë më e lehtë sesa zëvendësimi i tubave që ngrijnë dhe shpërthejnë. Për fat të mirë, kjo është relativisht e lehtë për t’u bërë, me ç’rast ne do t’ju ndihmojnë të parandaloni dëmtimet, shpenzimet dhe vështirësitë që mundeni të ballafaqoheni në situatat kur tubat dhe ujëmatëset janë ngrirë”, thuhet në njoftim.
KUR “Prishtina” jep edhe disa instruksione se si të bëhet mbrojtja.
“Gjeni valvolën kryesore të mbylljes së ujit p.sh në bllokun e banimit ( puseta me ujëmatësin kryesor ) apo në shtëpitë private. Tregoni të gjithë anëtarëve të familjes se si të mbyllni atë në rast të një tubi i cili mund të shpërthejë ose emergjencë të ngjashme. Në banimet kolektive, banorët duhet të dinë vendndodhjen e pusetës me ujëmatës dhe valvolën për ndërprerjen, po ashtu dhe valvolen për ndërprerje të rrjetit të hidrantëve të brendshëm në rast se keni shpërthim të tubit të hidrantëve. Apelojmë që në katet e përdhesës ku vertikalja e furnizimit është më shumë e ekspozuar në ajrin e ftohtë dhe mundësitë e rrjedhjes janë potenciale, andaj ju lutemi të merrni masa dhe izoloni qe të mos vijë deri te ngrirja. Apelojmë te konsumatorët që të bëjnë izolime në pusetat ku kanë të vendosur matësin e ujit që të mos vijë deri te ngrirja. Tubat që kanë më shumë gjasa të ngrihen janë ata që janë në muri të pa-izoluar mirë, garazhe, bodrume dhe ata të vendosur cektë nën sipërfaqen e tokës. Shtoni izolimin në mure të jashtme kudo që të jetë e mundur dhe mbyllni (vishni) gypat me izolim në garazhe dhe bodrume si dhe bëni izolim të brendshëm ujëmatësit me materiale që pengojnë ajrin e ftohtë”, thuhet në komunikatë.
