Udhëton 39 ditë me biçikletë nga Londra në Prishtinë, për të shënuar 10 vjetorin e Pavarësisë

I pasionuar pas udhëtimit me biçikletë, Labinot Sherifi ka sfiduar vetën që të nisë një rrugëtim më të gjatë se zakonisht.

Nga Londra, ku jeton që 26 vjet, ai me biçikletë u nis më 23 qershor e destinacion kishte kryeqytetin kosovar, Prishtinën, raporton KTV.

Pavarësisht vështirësive gjatë udhëtimit, Labinoti thotë se u mbajt shumë në qëllimin e këtij rrugëtimi, shënimin e dhjetëvjetorit të pavarësisë së Kosovës.

Kjo ia mundësoi atij kalimin nëpër disa shtete, ku e shfrytëzoi rastin të lobonte për vendin e tij.

Vendtakimi i Labinotit, pas më shumë se 30 ditësh, me familjarë e miq ishte Newborn-i, të cilët të entuziazmuar kishin dalë ta prisnin.

Labinotit udhëtimi i kushtoi rreth 2 mijë euro, derisa mbështetje financiare kishte vetëm nga familjarët.