Thaçi vlerëson unitetin e shqiptarëve në Luginë e që në Kosovë mungon

Presidenti i Kosovës, Hashim Thaçi, ka thënë se bashkimi i partive shqiptare të Luginës së Preshevës në një listë për zgjedhjet parlamentare, dha rezultat. Ai në një postim në Facebook, tha se ky shembull i unitetit duhet të ndiqet kudo ka shqiptarë.

“Bashkimi i shqiptarëve në Luginën e Preshevës e dha rezultatin e tij. Ata tashmë do të kenë më shumë deputetë që do ta ngrehin zërin për të drejtat e shqiptarëve atje. Bashkërendimi i veprimeve politike jep gjithmonë rezultate dhe Alternativa Demokratike Shqiptare është shembull i mirë për t’u ndjekur nga bashkëkombësit tanë kudo që jetojnë”, ka shkruar Thaçi.

Ndryshe nga partitë shqiptare në Luginë, në Kosovë e Shqipëri ka vite që uniteti nuk gjendet për gati asnjë temë. Së fundi në Kosovë, unitet nuk është arritur as për dialogun Kosovë – Serbi. Vetë Thaçi është kritikuar në shumë raste për përçarje të skenës politike.

Partitë shqiptare të mbledhura nën logon e Alternativës Demokratike Shqiptare, kanë siguruar dy deputetë në zgjedhjet parlamentare të Serbisë që u mbajtën të dielën, ndërkohë ka mundësi që të sigurohet edhe një mandat.