Thaçi: Bashkimi i aleatëve të Kosovës e bën të domosdoshëm përfundimin e dialogut Kosovë-Serbi

Presidenti i Kosovës, Hashim Thaçi, ka thënë se paralajmërimi i sekretarit të shtetit, Mike Pompeo, në Konferencën e Sigurisë në Munih, se do të ketë koordinim më të madh ndërmjet SHBA-së dhe Evropës, do të forcojë unitetin e aleatëve perëndimorë të Kosovës, i cili sipas tij, në tri vjetët e fundit kishte munguar.

Thaçi në Facebook ka shkruar se ky unitet do të reflektojë edhe në bashkimin e të gjitha forcave politike brenda Kosovës, duke krijuar një bazë të fuqishme për tejkalimin e sfidave historike që janë para nesh.

“Bashkimi i aleatëve strategjikë perëndimorë të Kosovës, e bën të domosdoshëm përfundimin e procesit të dialogut ndërmjet Kosovës dhe Serbisë, duke projektuar të ardhmen e shtetit tonë, bazuar në paqen dhe stabilitetin afatgjatë në Ballkanin Perëndimor”, ka thënë ai.