Dështimi i 45-të

Opozita e kaluar, në “seancën” pas seancës, e akuzon LVV-në për uzurpim të institucioneve

Deputetja e Partisë Demokratike të Kosovës, Blerta Deliu-Kodra, e ka akuzuar Lëvizjen Vetëvendosje duket thënë se e ka marrë peng Kosovën. 

“Sot kemi të bëjmë më një përpjekje të qartë për të shtypur pluralizmin politik, për të uzurpuar pushtetin përmes kontrollit total mbi institucionet e Republikës së Kosovës”, është shprehur Deliu-Kodra në fjalimin e mbajtur në foltoren e Kuvendit pas dështimit të 45-të të seancës konstituive. 

“Është e turpshme dhe antikushtetuese si deputetët e zgjedhur me votën e qytetarëve të Kosovës, sot nuk lejohen ta ushtrojnë mandatin e tyre kushtetues”, ka shtuar ajo.

Deliu-Kodra ka thënë se fjalimi i saj është një protestë. 

“Protestë ndaj një njeriu që sillet si një pronar i shtetit dhe jo si në shërbëtor i tij”, ka deklaruara ajo.

Deliu-Kodra ka thënë se si PDK-ja i bën thirrje kryeministrit në detyrë Albin Kurti që “të zbresë në tokë”. 

“T’i lërë inatet personale dhe të kthehet në rendin kushtetues e demokratike e të reflektojë. Kosova nuk mund të mbahet peng nga egoja jote personale Albin Kurti”, është shprehur Deliu-Kodra.

Edhe deputeti i Lidhjes Demokratike të Kosovës Ekrem Hyseni, e ka akuzuar Vetëvendosjen për uzurpim të institucioneve. 

“Uzurpimi i institucioneve, shkelja kushtetuese, ikja nga procedura, rendi i ditës në seancën konstituive të këtij Kuvendi, vetëm dëshmi shtesë janë se këta njerëz e bëjnë vetëm atë që i konvenon pushtetit por jo qytetarëve”, është shprehur Hyseni.

Deputetja e Aleancës për Ardhmërinë e Kosovës Time Kadrijaj, ka thënë se kryeministri në detyrë Albin Kurti, ka ardhur në pushtet me premtime të mëdha. 

“Një prej premtimeve ka qenë se do t’i luftojë oligarkët. A ëshë oligark Martin Berishaj i akuzuar për kryerjen e veprës penale keqpërdorim i pozitës dhe abuzim me miliona euro. A kemi pasur ndonjë shkarkim, jo, sepse ai është shok i Albin Kurtit duke e arsyetuar mafinë energjetike që e ka instaluar Kurti në Kosovë”, është shprehur Kadijaj.

Dështimi i 45-të

Photo: Driton Paçarada

Deputetët nuk e kanë konstituar Kuvendin as pas 45 përpjekjeve.

Edhe të premten deputetët kanë dështuar që ta formojnë komisionin për votim të fshehtë të kryetarit të Kuvendit.

Në sallë ishin 93 deputetë. Prej tyre, 49 votuan për anjë kundër dhe asnjë abstenim. 
Seanca e radhës do të mbahet të dielën nga ora 11:00.

Pati disa fjalime nga deputetët e opozitës para se të dështonte seanca e sotme. 

Deputeti i PDK-së, Abelard Tahiri, mori fjalën kur kryesuesi Avni Dehari ftoi partinë më të madhe opozitare ta propozojë një deputet për komision. 

Tahiri para se t’i ndalej mikrofoni tha se kjo është hera e 45 që kryesuesi i seancës Avni Dehari po e shkel Kushtetutën e Kosovës.

Ekrem Hyseni i LDK-së i propozoi Derahrit “të kthehet të rendi i ditës dhe ta respektojë vendimin e Gjykatës Kushtetuese”. 

E deputetja e AAK-së, Time Kadrijaj, tha se “ka një bllokadë të qëllimshme të seancës”. 

Pasi dështoi seanca, deputetët e tri partive opozitare vazhduan të qëndronin në sallë të Kuvendit. Kjo po bëhet si shenjë proteste “për mosrespektim të aktgjykimit të Kushtetueses nga partia që ka fituar më së shumti ulëse”. Ata mbajtën fjalime në foltoren e Kuvendit.

Pas mbylljes së seancës, deputetja e LVV-së, Mimoza Kusari-Lila, ka thënë se partitë e tjera po vazhdojnë shkeljet me deklarimet nga foltorja e Kuvendit pas përfundimit të seancës konstituive.

LDK: Qeveria Kurti i ka bërë dëm epokal shtetit të Kosovës

Deputetja e Lidhjes Demokratike të Kosovës, Jehona Lushaku-Sadriu, ka thënë se Qeveria Kurti i ka bërë dëm epokal shtetit të Kosovës.

Ajo ka folur për hetimet për kontrata njëburimore të cilat është duke i zhvilluar Prokuroria Speciale, duke thënë se për të gjitha këto përgjegjësinë e kanë zyrtarët e Qeverisë në detyrë. 

“Të gjithë këta që i kanë uzurpuar zyrat e Qeverisë bartin përgjegjësi për të gjitha këto vendime që po i marrin në mënyrë kundërkushtetuese, aq më tepër procedura prokurimi ku nënshkrimet e tyre validojnë përzgjedhje që janë në dëm të buxhetit të Kosovës”, është shprehur Lushaku-Sadriu, para vazhdimit të 45-të të seancës konsituive.

“Mirëpresim secilin hetim për të sqaruar tenderët njëburimor, është e pakapshme se si një parti ka ardhur  në pushtet me kauzën kundër korrupsionit e tani po bëhet simbol i korrupsionit në vend, proceset që i ka kritikuar është duke i aplikuar”, ka shkruar ajo.

Ajo ka thënë se nuk po shohim vullnet për të arritur marrëveshje politike. 

“Për të 45-tën herë po vijmë në Kuvend për ta konstituuar Kuvendin, organin më të larë ligjbërës, nga i cili pastaj del Qeveria, por kjo po pamundësohet par ta mbajtur fuqinë ekzekutive Qeveria, për ta mbajtur një kryeministër pa legjitimitet dhe nja 15 ministra e zëvendësministra që janë betuar si deputetë”, ka deklaruar Lushaku – Sadriu.