Të shpërfillur nga shteti, pacientët me kancer barnat i blejnë me paratë e socialit

Përveç me sëmundjen e kancerit, një e moshuar e intervistuar nga KOHA, përballet edhe me mungesë të barnave të Listës Esenciale në Klinikën e Onkologjisë.

Nga muaji maj kur është diagnostikuar me kancer një pjesë të barnave ajo i ka paguar vetë. E ka lavdëruar stafin e kësaj klinike për kujdesin, por barra e shpenzimeve që shteti nuk po arrin t’ia mbulojë, sipas saj, është e rëndë.

“Barnat sot kushtuan 115 euro. Herën tjetër kam paguar 65 euro, 45 euro. I kam faturat krejt, por i kam lënë në shtëpi”, ka thënë e moshuara.

Kushtet financiare të pacientes nuk janë të mira. Paratë e ndihmës sociale shpesh herë i duhet t’i përdorë për terapi.

“Një vëlla e kam dhe ai tash del në pension. Një social e marrë qe besa prej 75 euro se e kam një vëlla të sëmurë e i marr që e këqyri. Ku me i marr parët diku tjetër”, tha pacientja.

Edhe pacientë të tjerë dilnin të hënën nga kjo klinikë, pasi kishin blerë vetë barnat për terapi. Familjari i njërit nga pacientit rrëfeu se si u detyruan të sjellin barna në QKUK në vlerë të 100 eurove.

“Terapinë që na kanë dhënë nuk patën, u dashtë më dalë me i ble....101.5 euro”, tha një pacient.

Edhe Arbëri 31 gus 2025 Në mungese barnash nga Lista Esenciale, shteti obligohet t’i rimbursojë pacientët

Për t’i mbuluar këto shpenzime, pacienti thotë se po ndihmohet nga rrethi i gjerë i familjes.

“E papërballueshme është, por na janë bashkangjitur familjarët e po na ndihmojnë. D.m.th. mjerë ai që s’ka. Ai që ka nuk e ka vështirë, por dikush që ka social me 80 euro nuk mundet me ia dalë”, shtoi ai.

Përmbushja e Listës Esenciale është sfidë e secilës qeveri.

Qeveria Hoti e pati ulur buxhetin për barna për rreth 50 për qind. Në rishikim, Qeveria Kurti pati shtuar buxhetin për 8 milionë euro dhe 3.7 milionë euro që janë transferuar para disa ditësh, por të pamjaftueshme për plotësimin e të gjitha nevojave.