Stano: Kosova dhe Serbia duhet t'i zbatojnë plotësisht të gjitha marrëveshjet

Nëntë vjet pas nënshkrimit të marrëveshjes së Brukselit mes Kosovës dhe Serbisë, Bashkimi Evropian ende pret që dialogu të përfundojë me sukses dhe kërkon që marrëveshjet e arritura mes të dyja palëve të zbatohen plotësisht.

Zëdhënësi i Bashkimit Evropian për çështje të Politikës së Jashtme dhe Sigurisë, Peter Stano, i ka thënë KOHËS se BE-ja pret që të zbatohen të gjitha marrëveshjet e kaluara.

“Gjithçka që është rënë dakord duhet të zbatohet plotësisht. Tani është koha për të ecur përpara dhe për ta çuar këtë proces (Dialogun për normalizimin e marrëdhënieve ndërmjet Kosovës dhe Serbisë) në një përfundim të suksesshëm”, ka thënë ai.

Stano shtoi se BE-ja vazhdon të punojë me të dyja palët drejt marrëveshjes gjithëpërfshirëse për normalizimin e marrëdhënieve, duke adresuar “të gjitha çështjet e pazgjidhura”.

“BE-ja dhe shtetet e saj anëtare presin që të dyja palët e dialogut të bëjnë përparim të shpejtë dhe të shohin Beogradin dhe Prishtinën të angazhohen seriozisht në të. Bashkimi Evropian dhe shtetet e tij anëtare presin gjithashtu që palët të zbatojnë plotësisht të gjitha marrëveshjet e kaluara”, theksoi Stano.

Marrëveshja e 19 prillit, ndër tjerash, përmban pika që flasin për asociacionin e komunave me shumicë serbe dhe shpërbërjen e strukturave paralele në veri. Marrëveshja qe nënshkruar nga Hashim Thaçi, atëherë kryeministër i Kosovës, dhe Ivica Daçiq, i Serbisë.