Spahiu: Deklarata e Macronit, paralajmërim për Qeverinë e Kosovës

Ish-ambasadori i Kosovës në Shtetet e Bashkuara të Amerikës, Avni Spahiu, ka thënë se deklarata e së martës e presidentit francez, Emmanuel Macron për liberalizimin e vizave, nuk është kërcënim por paralajmërim për Kosovën.

Sipas tij, ky paralajmërim është bërë në veçanti për Qeverinë e Kosovës.

“Mendoj se të gjitha këto elemente së bashku u bënë pas një deklarate, e cila krijoi paqartësi dhe u diskutua gjatë tërë ditës, duke filluar nga gjuha e përdorur e presidentit francez deri te sqarimi nga kabineti i tij në pasditen e sotme. Sidoqoftë duhet kuptuar që kjo është një vërejtje, nuk do ta quaja kërcënim. Është një paralajmërim që i bëhet Kosovës, sidomos Qeverisë së saj”, tha Spahiu në televizionin publik.

Ai ka shtuar se në deklaratën e Macronit, problemi nuk ishte vetëm te përkthimi.

“Përkthimi ishte në atë aspektin se nuk u tha nga Macron që Franca definitivisht është kundër liberalizimit të vizave, por ajo mund të vihet në pikëpyetje në qoftë se nuk e mban fjalën qeveria kosovare. Tani se për çfarë e kishte fjalën ai është një çështje që duhet diskutuar. Çfarë i është premtuar dhe çfarë nuk është bërë. Është një paralajmërim se tani Bashkimi Evropian do të jetë më aktiv, shumë i ashpër në vazhdimin e dialogut dhe kërkesat sidomos për formimin e Asociacionit do të jenë më të drejtpërdrejta dhe më të vendosura”, është shprehur ai.