Sistemi i drejtësisë mund të paralizohet gjatë shtatorit

Shtatori mund të paralizojë edhe një herë tjetër sistemin e drejtësisë. Krejt kjo nëse nuk përmbushen kërkesat e sindikalistëve për shtesa prej 50 eurosh dhe transport drejt Pallatit të Drejtësisë, deri në fund të këtij muaji, raporton KTV.

Ministri i Drejtësisë, Abelard Tahiri, sërish është zotuar se marrëveshja do të realizohet plotësisht.
Kishin kërkuar rritje prej 100 % të pagave, por ishin mjaftuar me shtesa prej 50 eurosh.
Këto shtesa, punëtorët e administratës në Gjykata e Prokurori ende nuk i kanë marrë.

E gati 1 muaj nga përfundimi i grevës, ministri i Drejtësisë, Abelard Tahiri, nuk ka pranuar të japë detaje rreth marrëveshjes për pezullimin e grevës.

Tahiri ka thënë se marrëveshja do të zbatohet.

Por, kryetari i Sindikatës së Judikaturës, Asllan Rusinovci, ka konfirmuar se ishin pajtuar për shtesa prej 50 eurosh dhe sigurimin e transportit për në Pallatin e Drejtësisë.

E afati për realizimin e këtyre kërkesave është deri në fund të muajit gusht.

Në Interaktiv të KTV-së, Ministri Tahiri ka lënë të kuptohet se shtesat mund të zbatohen deri në hyrjen në fuqi të Ligjit për Pagat, ligj me të cilin pritet të rregullohen pagat e sektorit publik.

Pas rritjes së pagave për gjyqtarë e prokurorë, punëtorët e administratës në këto institucione, më 4 korrik, hynë në grevë me kërkesë për rritje pagash prej 100%, ndërsa grevën e pezulluan me datën 11.