Sindikatat e Shëndetësisë u apelojnë partive që t’u përmbahen masave gjatë fushatës zgjedhore

Federata e Sindikatave të Shëndetësisë së Kosovës ka apeluar tek subjektet politike që në prag të fushatës zgjedhore t’u përmbahen rekomandimeve dhe masave për të mos lejuar përhapjen e COVID-19.

“Zbatimi i masave anti COVID-19 është i domosdoshëm dhe i detyrueshëm, çdo veprim tjetër në kundërshtim me Ligjin për parandalimin dhe luftimin e pandemisë COVID-19, dhe vendimeve në fuqi për zbatimin e masave të përgjithshme dhe specifike për mbrojtjen nga pandemia COVID-19 mbeten përgjegjësi e liderëve të këtyre subjekteve, kurse në anën tjetër bëhet barrë e institucioneve shëndetësore gjegjësisht punëtorëve shëndetësor të cilët po i bëjnë një vit duke u marr intensivisht me trajtimin e qytetarëve të infektuar me COVID-19”, thuhet në një komunikatë të Federatës.

Mos u bëni shkaktar të kësaj të keqeje sepse populli do ju ndëshkoj, të gjithëve pa përjashtim, është thirrja që ka bërë Federata nga subjekteve politike.

“Andaj edhe njëherë FSSHK kërkon nga subjektet politike që në tubimet e tyre për shpalosje të programeve ta kenë prioritet marrjen e masave për parandalimin e përhapjes së infeksionit COVID-19”, përfundon komunikata.