Një anketë e realizuar në Kosovë dhe Shqipëri për marrëdhëniet mes dy shteteve, ka nxjerrë në pah qëndrimet e qytetarëve në të dy anët e kufirit për raportet ndërshtetërore para dhe pas marrëveshjeve që janë duke u nënshkruar mes dy qeverive.
Nën 35 për qind është shifra e atyre që mendojnë se në vitin e kaluar janë përmirësuar raportet ndërshtetërore, ndërsa një pjesë e konsiderueshme e qytetarëve mendojnë se ato s’kanë lëvizur fare. Përderisa në Shqipëri 45.6 për qind e të anketuarve thonë se raportet vitin e kaluar kanë qenë njëjtë sikur më herët, në Kosovë kështu mendojnë 31 për qind. Se situata është përkeqësuar vitin e shkuar në raportet ndërshtetërore, mendojnë 18 për qind e qytetarëve të anketuar në Kosovë dhe 11.3 për qind e të anketuarve në Shqipëri. Se gjendja është përkeqësuar shumë në Kosovë mendojnë tre për qind, ndërsa në Shqipëri më pak se një për qind.
Se a duhet që marrëdhëniet mes dy vendeve të jenë shumë më të mira krahasuar me vendet tjera të Ballkanit mendojnë shumica dërrmuese e qytetarëve.
Ata po ashtu shohin se qytetarët janë më pranë njëri-tjetrit sesa qeveritë e tyre. E përgjigje më pozitive për këtë kanë dhënë në Shqipëri, në krahasim me qytetarët e anketuar në Kosovë.
29.8 për qind e qytetarëve të anketuar në Kosovë dhe 28.8 për qind e atyre të anketuar në Shqipëri s’kanë informata për marrëveshjet e deritashme të arritura mes dy shteteve.
61.7 për qind e qytetarëve në Shqipëri thonë se ato s’kanë pasur ndikim në jetën e tyre të përditshme, ndërsa në Kosovë përqindja ka qenë 26.53 për qind.
Hulumtimi është realizuar në Kosovë dhe Shqipëri gjatë muajit tetor nga “Fondacioni i Kosovës për Shoqëri të Hapur” dhe “Fondacioni Shoqëria e Haur për Shqipërinë”. Në Kosovë janë anketuar 950 qytetarë, ndërsa në Shqipëri 1000. Të gjithë mbi moshën 18-vjeçare.
Të premten dy Qeveritë do të takohen në Elbasan për mbledhjen e përbashkët. Aty pritet të nënshkruhen disa marrëveshje.
