Shoqëria civile e cilëson sulm mbi cilësinë në arsim propozimin e Likajt për ministër të Arsimit

Partia e ish-kryeministrit të Kosovës, Ramush Haradinaj, i cili disa herë kishte ndërhyrë në veprimtarinë e institucioneve të pavarura arsimore, pritet ta marrë drejtimin e Ministrisë së Arsimit.

Për ministër, Aleanca për Ardhmërinë e Kosovës (AAK) ka propozuar profesorin e Universitetit të Prishtinës, Ramë Likaj. Megjithatë, ky emër ka ngjallur reagime të shoqërisë civile.

Sipas Organizatës për Rritjen e cilësisë në arsim, Likaj është i përfshirë në skandalin më të madh të UP-së si një nga profesorët e avancuar përmes plagjiaturës e mashtrimit akademik. Propozimi i tij si ministër, sipas ORCA-s, është sulm direkt mbi cilësinë në arsim, shkruan KOHA.

“Ramë Likaj është avancuar nga pozita e profesorit të asocuar në atë të profesorit të rregullt në vitin 2018 përmes një procesi mashtrues. Likaj me rastin e avancimit të tij ka paraqitur 19 punime shkencore brenda 1 viti e gjysmë, sa 19 fishi i kolegëve të tij norvegjezë që arrijnë të publikojnë jo më shumë se 1 punim në vit. Së bashku me 7 profesorë të tjerë, Likaj është avancuar përmes punimeve në revista false, të cilat u kanë mundësuar atyre që përmes mashtrimeve akademike ta fryjnë numrin e punimeve”, thuhet në njoftim.

Kjo organizatë ka theksuar se do t’i ndërmarrë të gjitha veprimet e nevojshme për ta parandaluar dhe luftuar një sulm të tillë, duke përdorur të gjitha mjetet demokratike në dispozicion.

Edhe Video 29 pri 2020 Propozimi që Likaj të udhëheqë Ministrinë e Arsimit ngjall reagime të shoqërisë civile

Agron Demi nga Instituti “GAP”, në një postim në Facebook, ka shkruar se partia që e përjashtoi Kosovën nga Rrjeti Evropian i Sigurimit të Cilësisë, do ta udhëheqë Ministrinë e Arsimit.

Drejtimin e arsimit nga Aleanca për Ardhmërinë e Kosovës po e kritikon edhe njohësi i çështjeve të arsimit, Argjend Osmani, sipas të cilit gjendja në këtë sektor vetëm sa do të përkeqësohet.