Shtetet e Bashkuara të Amerikës dhe misioni i OSBE-së në Kosovë kanë dënuar djegien e një shtëpie në fshatin Veriq të Istogut, ku supozohej të banonte një serb i Kosovës. Ata kanë bërë thirrje që autoritetet e vendit ta hetojnë rastin.
Policia e Kosovës ka thënë se ishte njoftuar për rastin të hënën, 10 korrik, në mëngjes nga fqinji i viktimës. Në vendngjarje kishin dalë zjarrfikësit e njësitet e tjera, kanë thënë nga PK-ja.
Ambasadori amerikan në Kosovë, Jeff Hovenier, e ka dënuar sulmin. Ai ka shkuar në shtëpinë e djegur dhe nga aty ka dënuar këtë veprim.
“E vizitova që ta shoh vetë, me lejen e familjes, e cila kishte qëllim të rikthehej në pronën e saj. E dënoj këtë sulm dhe këtë përpjekje për të frikësuar një familje nga ushtrimi i të drejtës së saj për t’u rikthyer në shtëpinë e tyre”, ka thënë Hovenier.
This home in Istok/g suffered a criminal arson attack. I visited to see it myself, with the permission of the family, who intended to return to their property. I condemn this arson attack, and this effort to intimidate a family from exercising their right to return to their home. pic.twitter.com/RsYhRrKioP
— Ambassador Jeff Hovenier (@USAmbKosovo) July 11, 2023
E, OSBE-ja ka thënë se fajtorët për këtë veprim duhet të sillen para drejtësisë.
“Bashkë me institucionet e Kosovës dhe partnerët ndërkombëtarë, fuqishëm mbështesim rikthimin e personave të zhvendosur, në përputhje me mandatin tonë për të drejtat e njeriut dhe pajtim”, ka shkruar OSBE-ja.
Edhe
Sveçla kërkon hetim të shpejtë të djegies së shtëpisë së një serbi në Istog
Sulmin e ka dënuar edhe kryetari i Komunës së Istogut, Ilir Ferati. Ai ka thënë se Republika dhe komuna që ai drejton “janë të të gjithë qytetarëve pa dallim, ashtu siç theksohet në Kushtetutën e vendit tonë, prandaj mirëpres gatishmërinë e institucioneve të Republikës dhe Ambasadës amerikane për të vazhduar mbështetjen për familjen e prekur dhe të gjithë të kthyerve në komunën tonë”.
Ai ka shtuar se shtëpia sapo ishte ndërtuar për të kthyerin, Svetisllav Veriqi.
