Profesori amerikan dhe eksperti për Ballkanin, Daniel Server, në një intervistë për RTK, ka thënë se ngërçi në konstituimin e Kuvendit dhe formimin e qeverisë dëmton imazhin e Kosovës si një histori suksesi demokratik.
Ai ka theksuar se kriza nuk pritet të sjellë paqëndrueshmëri të brendshme, por e pengon funksionalitetin e institucioneve dhe përparimin drejt integrimit euroatlantik. Sipas tij, situata e dobëson Kosovën në dialogun me Serbinë, ndërsa hapi i parë i domosdoshëm është arritja e një marrëveshjeje për qeveri funksionale.
“Kjo është një lloj mosmarrëveshjeje që haset shpesh në sistemet parlamentare. Megjithatë, kushtetuta e Kosovës nuk ofron një mekanizëm të qartë për zgjidhjen e saj...Për Kosovën është një pengesë serioze të mos ketë një qeveri plotësisht funksionale dhe të fuqizuar. Nuk pres paqëndrueshmëri të brendshme si pasojë e saj”, tha Serwer.
Ai tha se dialogu Kosovë – Serbi është pezulluar jo vetëm shkaku i situatës në Kosovë.
“Dialogu, në fakt, është i pezulluar – jo vetëm për shkak të situatës në Kosovë, por edhe sepse Serbia nuk ka treguar gatishmëri për të zbatuar marrëveshjet e arritura më herët. Në këtë kuptim, kriza e dobëson Kosovën në përgjithësi”, tha eksperti amerikan.
Ai ka shtuar se Serbia mund të tentojë ta shfrytëzojë këtë moment.
“Beogradi me gjasë do të tentojë. Megjithatë, gjendja e brendshme në Serbi është më pak stabile dhe më pak demokratike sesa ajo në Kosovë”, tha ai.
Serwer mendon se situata aktuale është pasqyrim i problemeve më të thella dhe afatgjata. Profesori amerikan thotë se situata ndikon në përparimin e Kosovës drejt integrimit euroatlantik.
“Kosova nuk mund të bëjë përparim politik pa një qeveri të plotësisht funksionale. Përgatitjet për NATO dhe BE mund të vazhdojnë, por pa legjislacion të miratuar, shumë pjesë të acquis communautaire nuk mund të zbatohen”.
Serwer tha se hapi i parë është të formohet një qeveri funksionale në Kosovë dhe e fuqizuar.
Kuvendi i Kosovës të shtunën nuk arriti ta zgjidhte nënkryetarin nga radhët e komunitetit serb. Por, kryeparlamentari Dimal Basha e quajti të përmbyllur konstituimin e Kuvendit.
Për të hënën është paralajmëruar edhe mbledhja e Kryesisë së Kuvendit, por vetëm dy nga nënkryetarët e zgjedhur pritet të marrin pjesë – pasi PDK-ja e LDK-ja konsiderojnë se Kuvendi nuk mund të llogaritet si i konstituuar në mungesë të nënkryetarit serb.
Derisa nuk është publikuar ndonjë agjendë, kryetari i Kuvendit, Dimal Basha, ka paralajmëruar se në këtë mbledhje do të diskutohet se si të veprohet tutje me punën e Kuvendit.