Selmanaj reagon pas vendimit të LDK-së për takim me Vjosa Osmanin

Zëvendëskryeministri në detyrë Driton Selmanaj, ka thënë se çdo përpjekje për ta diferencu Vjosa Osmanin nga Albin Kurti dhe Vetëvendosja, është përpjekje “për transferim të votës tek projekti i këtij binomi të dëmshmëm politik”.

Selmanaj ka reaguar pasi kryetari i ri i LDK-së, Lumir Abdixhiku, ka thënë se ka marrë mbështetje të plotë në propozimin e tij për të takuar kandidaten për presidente nga radhët e listës së Vetëvendosjes, Vjosa Osmani.

Krerët e LDK-së kanë biseduar këtë javë me Kurtin e Osmanin në lidhje me formimin e Qeverisë, mirëpo për çështjen e presidentes ata kanë thënë se do të takohen sërish ndaras me Osmanin.

Selmanaj ka thënë se “vrapi e turri” për ta takuar Osmanin është pos turr për ta rrëzuar edhe më shumë LDK-në.

“Çdo përpjekje për ta nda apo diferencu Vjosen nga Albini dhe Vetëvendosja, është përpjekje për ta transferu mashtrueshëm votën tek projekti i këtij binomi të dëmshëm politik. ‘Turri dhe vrapi’ për ta takuar Vjosën, nuk është asgjë tjetër pos turr për ta rrëzuar edhe më shumë LDK dhe dinjitetin e 110 mijë votuesve QËNDRESTARË të saj”, ka shkruar Selmanaj në Facebook.