Rusisë nuk po i pëlqen neutraliteti i Serbisë

Gazeta ruse Kommersant e ka vlerësuar si dyfytyrësi deklaratën e presidentit të Serbisë Aleksandar Vuçiq, se vendit të tij nuk i duhet bazë ushtarake e asnjë shteti, shkruan “Danas” të hënën.

Këtë, gazeta e ka përceptuar si synim të Vuçiqit për të mos shtyrë para temën e ndërtimit të një baze ushtarake ruse në Serbi dhe në të njëjtën kohë për të mos prishur marrëdhëniet me Moskën.

Idenë e ndërtimit të bazës e hodhi në fillim të javës së shkuar ambasadori rus në Beograd, Alexandr Botsan Harchenko. Analistë serbë e vlerësuan këtë si minim të rrugës evropiane të Serbisë.

Deklarata e ambasadorit, kujton gazeta ruse, u bë një javë pasi presidenti i Bjellorusisë, tha se Serbia duhet të përcaktohet se cilën anë dëshiron ta mbajë, meqë nuk mund të ulet në tri karrige: SHBA, BE dhe Rusi.

Serbia deri më tash ka refuzuar t’i vë sanksione Rusisë për pushtimin e Ukrainës, me gjithë thirrjet e vazhdueshme të BE-së dhe SHBA-së.

Serbia është ndër vendet e vetme në Evropë që nuk i ka vënë sanksione Rusisë për agresionin në Ukrainë, të nisur më 24 shkurt.