Çmimi i një ilaçi që përdoret për tension është i ndryshëm në barnatore të ndryshme të Prishtinës.
“Atoris/40” shitet me çmime nisur nga 4 euro e 60 centë deri në 6 e 40 centë.
Të luhatshme janë edhe çmimet e barnave, si “Lercanil” që varion nga 9 e 90 deri në 10 euro e 60 cent e “Enalaprillit” nga 1.50 – 1.80.
Diferencë prej njëzet-tridhjetë centësh ka madje edhe “Aspirini”.
E kjo situatë është e përditshme me pothuajse të gjitha barnat që nga paslufta në Kosovë.
Edhe
Kërkohet rregullimi me ligj i sektorit farmaceutik në interes të pacientëve
Krejt kjo pasi Kosova, pas Bjellorusisë është një nga dy vendet e vetme në Evropë që nuk e ka të rregulluar çmimin e barnave me ligj.
Iniciativa për gjetjen e një zgjidhjeje përmes udhëzimeve administrative ka pasur qysh nga 2007-a, por që të gjitha ishin me mangësi sa i përket zbatimit në praktikë të tyre.
Pikërisht me këtë arsyetim është shfuqizuar edhe udhëzimi administrativ për rregullimin e çmimit të barnave i nënshkruar në vitin 2019 nga ministri i atëhershëm i Shëndetësisë, Uran Ismaili.
Ish-Kryeshef i Agjencisë së barnave, Zijadin Gashi, ka thënë se për 15 vjet ka pasur iniciativa për rregullimin e çmimit të barnave, të cilat nuk kanë pasur mbështetje ligjore.
“Ju thash se çështja e nivelizimit të çmimit të barnave deri tash më tepër ka qenë e karakterit të marketingut politik ku është mundu të gjendet një zgjidhje e shpejtë por e pabazuar në baza ligjore, dhe kjo dmth me ndërrimin e strukturave politike që kanë qenë në kuadër të ministrisë e ka sjell që ky problem të sillet strukturë pas strukture dhe ka ardhur deri te kjo situatë ku edhe sot jemi në një gjendje të tillë”, ka deklaruar Zijadin Gashi, ish-kryeshef i Agjencisë së Barnave.
Edhe
Kosova ende me treg të çrregulluar farmaceutik
Megjithatë, sipas Ministrisë së Shëndetësisë, kjo çështje pritet të rregullohet me ligj gjatë këtij viti.
“Ministria e Shëndetësisë ka hartuar koncept-dokumentin për çmimin e barnave, i cili do t'i paraprije Ligjit për rregullimin e çmimit të barnave në Kosovë, që duhet të miratohet gjatë këtij viti për të rregulluar këtë çështje në mënyrë specifike. Udhëzimi të cilit i referoheni nuk ka mundur të jetësohet për shkak të zbrazëtirave që ka pasur në zbatimin praktik, të cilët synohet te evitohen përmes Ligjit për çmimin e barnave”, thuhet në përgjigjen e Ministrisë së Shëndetësisë.
E, kryetari aktual i Odës së Farmacisë së Kosovës, Arianit Jakupi, thotë se kjo çështje mbetet një nga shqetësimet më të mëdha të Komunitetit farmaceutik.
“Ligji ka paraparë rregullimin në kuptimin e vlerësimit të çmimit dhe krahasimit të çmimit e të njëjtit produkt në shtete rajonale, duke përdorur një metodologji të njohur të OBSH dhe shumë shteteve që e përdorin atë”, ka dekalruar Arianit Jakupi nga Oda e Farmacisë së Kosovës.
Qytetarët të cilët përballen çdo ditë me këtë fenomen shpresojnë që kjo të rregullohet sa më parë.
Edhe
Ministria e Shëndetësisë rishikon çmimin e produkteve medicinale
“Mirë kish me qenë shumë, shumë kish me qenë mirë se çmimet ndryshojnë prej barnatores në barnatore me qenë unike kish me qenë më mirë se tash oferta e kërkesa e bëjnë të veten”, -ka thënë Januz Haziri, qytetar.
Projektligji për Rregullimin e Çmimit të Produkteve medicinale është përfshirë në Programin Legjislativ për vitin 2022 e Qeveria e ka në plan ta aprovojë atë deri më 30 shtator.
