Rithemelohet Këshilli i Turizmit të Kosovës, disa anëtarë të panjoftuar për emërim

Në qershor të vitit 2016 pati përfunduar mandati i anëtarëve të Këshillit të Turizmit të Kosovës dhe për dhjetë muaj ky këshill ka qenë jofunksional.

I themeluar për herë të parë më 26 qershor 2013-të, ai është kthyer në funksion, por sipas kumtesës së Qeverisë së Kosovës, duke u themeluar përsëri, më 19 prill të këtij viti, shkruan sot Koha Ditore.

Po atë ditë, gazeta ka komunikuar në telefon me ministren e Tregtisë dhe Industrisë, Hykmete Bajrami, e cila ishte në një vizitë në Paris, që shkurt ka thënë që gjithçka ka shkuar nëpërmes Ligjit për Turizëm.

“Ka përfunduar mandati i anëtarëve të Këshillit të themeluar më 2013-n dhe sot është themeluar me anëtarë të tjerë. Gjithçka ka shkuar sipas Ligjit për Turizëm”, ka thënë ajo, në pyetjen se a ka qenë e nevojshme të rithemelohet, apo vetëm të ketë emërime të tjera.

Këshilli i Turizmit të Kosovës është i sqaruar në Nenin 20 të Ligjit për Turizëm, ku thotë se “Qeveria e Republikës së Kosovës me propozim të Ministrisë e emëron Këshillin e turizmit të Kosovës”, duke mos u përmendur themelimi. (Më gjerësisht mund të lexoni në numrin e sotëm të Kohës Ditore)

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.