Rihapet konkursi për pozitën e Sekretarit të UP-së

Është rihapur konkursi për pozitën e Sekretarit të Përgjithshëm në Universitetin e Prishtinës “Hasan Prishtina”.

Konkursi do të jetë i hapur deri më 14 nëntor të këtij viti.

Fillimisht ky konkurs ishte hapur në maj të këtij viti, mirëpo ishte pezulluar në fazën e intervistimit të kandidatëve, pasi Ministria e Punëve të Brendshme vlerësoi se konkursi do të duhej të ishte shpallur i jashtëm dhe jo i brendshëm.

Përveçse konkursi është shpallur i brendshëm edhe një sërë parregullsish janë hasur në këtë proces. Dokumenti për hapjen e konkursit nuk ka nënshkrim e po ashtu i mungon identiteti i personit përgjegjës për shpalljen e konkursit.

Në garë ishin ish-sekretari Esat Kelmendi dhe ushtruesi i detyrës të kësaj pozite, Besfort Krasniqi.

Pozita e Sekretarit ka mbetur me ushtrues detyre që nga tetori i vitit 2021, pasi me përfundimin e kontratës të Sekretarit të atëhershëm Esat Kelmendi, rektori Naser Sahiti kërkoi që t’ia vazhdojë mandatin Kelmendit për shkak “të arritjeve të tij në këtë pozitë”.

Edhe Arbëri 16 mar 2023 Besfort Krasniqi zgjidhet sekretar i UP-së

Mirëpo, prapë përmes një interpretimit të MPB-së, u konstatua se nuk ka bazë ligjore që mandati të vazhdohet me automatizëm.

“Bazuar në paragrafin 4 të nenit 2 të Ligjit nr 06L-114 për Zyrtarët Publik, të punësuarit në sektorin e arsimit kanë statusin e nëpunësit të shërbimeve publike. Në mungesë të akteve nënligjore për rekrutimin, klasifikimin, transferimin, vazhdimin e mandatit, sistemin dhe elementeve të tjera të marrëdhënies së punës, për nëpunësit e shërbimeve publike, duhet të zbatohen drejtpërdrejt dispozitat e Pjesës II respektivisht nenet 6,7,8 dhe 9 si dhe dispozitat e Pjesës V (nëpunësit e shërbimeve publike, respektivisht nenet prej 64 deri në 74 të Ligjit Nr.06l-112 për Zyrtarët Publik. Duke marr për bazë dispozitat e lartcekura, konstatojmë se me mbarimin e mandatit të nëpunësve të shërbimit publik nuk ka bazë ligjore për vazhdimin e mandatit”, thuhet në përgjigjen e MPB-së.

Pas kësaj, Këshilli kishte vendosur që mos t’ia vazhdojë mandatit Kelmendit, në vend të tij ishte emëruar si ushtrues detyre, Besfort Krasniqi. Ndërkaq Kelmendi pas largimit nga pozita e Sekretarit, është emëruar drejtor i Zyrës Ligjore në UP.