Refuzohen të shtunat, në kryeqytet mësim u mbajt edhe me vetëm nga dy nxënës

Edhe e shtuna e dytë e kalendarit të ri shkollor u shënua me prezencë të vogël të nxënësve në shkolla për të ndjekur mësimin. Disa shkolla në kryeqytet kanë treguar se kanë mbajtur orët edhe me nga dy nxënës. E prindërit kanë vazhduar të qëndrojnë pas thirrjes së tyre që në fundjavë të mos mbahet mësim

Edhe këtë të shtunë shumica e klasave në shkollat e kryeqytetit mbetën bosh apo me numër të vogël nxënësish.

Të paktë ishin ata prindër që i dërguan fëmijët e tyre për të ndjekur mësimin në ditë vikendi, ashtu siç parashihet me kalendarin e ri shkollor.

Në shkollën fillore “Ismail Qemali”, që numëron afër 3 mijë nxënës, tregojnë se për dallim nga e shtuna e kaluar, këtë javë përqindja e mungesave është edhe më e madhe.

Ushtruesja e detyrës së drejtoreshës së kësaj shkolle, Mimoza Krasniqi, thotë se kjo mënyrë e mbajtjes së mësimit nuk tregon efekt.

“Në procesin mësimor janë vetëm 8 për qind, ndërsa tek cikli i ulët përqindja është po ashtu shumë e ulët, që është 18 për qind. Vetëm pesë mësuese janë duke mbajtur mësim, një mësuese është me dy nxënës, tjetra e ka një numër të konsiderueshëm të fëmijëve”, ka thënë ajo.

Edhe Arbëri 12 nën 2022 Të shtunat pa nxënës, një shkollë bën zgjidhje me aktivitete të lira

Situatë e ngjashme ishte edhe në shkollat e tjera të ciklit të ulët në kryeqytet, në të cilat nuk dëshiruan të prononcoheshin para kamerës.

Në shkollën fillore “Hasan Prishtina” një mësimdhënëse që ligjëron lëndën e gjuhës angleze tregon se në disa klasa ka hasur në pengesa.

“Numri i nxënësve në disa klasa ka qenë i vogël, por në disa klasa ka qenë një numër që kemi mundur me mbajt mësimin. Fëmijët prindërit nuk i kanë sjellë në shkollë për arsye të tyre, për shkak se ishte vikend, por ne është dashtë me mbajt mësimin”, ka deklaruar mësimdhënësja Lule Hoxha.

E në SBASHK kanë pasur një kërkesë tjetër.

“Ligji i punës edhe kontrata kolektive e precizon që java e punës është nga e hëna deri të premten, dhe nëse për cilindo shkak punëtorët e arsimit angazhohen ditëve të vikendit apo festave, është i obliguar shteti që t’i paguajë edhe pjesën për vikende që i bie afro 50 për qind më shumë sesa mëditja e zakonshme”, ka thënë kreu i Sindikatës, Rrahman Jasharaj.

Edhe Arbëri 15 tet 2022 Shkollat pa nxënës të shtunave, MASHTI ngulmon, prindërit kundërshtojnë, SBASHK-u nxjerr përqindje

Këshilli i Prindërve një ditë më parë ka ripërsëritur qëndrimin që në fundjavë të mos mbahet mësimi.

KOHA i ka pyetur DKA-në në Prishtinë, si dhe Ministrinë e Arsimit për mbarëvajtjen e mësimit në nivel vendi, por nuk ka marrë sqarime.