QUINT: Qeveria të mos marrë masa të reja për të hyrë me forcë në ndërtesat komunale në veri

Shtetet e QUINT-it përmes një deklarate për media kanë thënë se dënojnë vendimin e Kosovës për të hyrë me forcë në ndërtesat komunale në veri të Kosovës, pavarësisht thirrjeve të vazhdueshme për përmbajtje.

Në këtë kontekst, thuhet se QUINT-i dhe BE-ja presin që Qeveria të mos marrë masa të reja për të arritur qasje me forcë në ndërtesat komunale në veri.

QUINT-i ka kërkuar nga kryetarët e zgjedhur që gjithashtu të tregojnë përmbajtje dhe të ndërmarrin veprime të menjëhershme për të demonstruar përkushtimin dhe përgjegjësinë e tyre për të përfaqësuar dhe shërbyer të gjithë anëtarët e komuniteteve të tyre.

“Në të njëjtën kohë, ne i paralajmërojmë fuqishëm të gjitha palët kundër kërcënimeve ose veprimeve të tjera që mund të ndikojnë në një mjedis të sigurt, duke përfshirë lirinë e lëvizjes, dhe që mund të nxisin tensionet ose të nxisin konflikt. Ne jemi veçanërisht të shqetësuar për sigurinë dhe mirëqenien e civilëve, policëve, anëtarëve të EULEX-it dhe KFOR-it. Veprimet e reja të njëanshme do të ndikojnë negativisht në marrëdhëniet me vendet e QUINT-it dhe BE-në”, thuhet në njoftim.

QUINT-i dhe BE-ja theksojnë se dialogu i lehtësuar nga BE-ja është rruga drejt normalizimit të marrëdhënieve dhe pranimit në Bashkimin Evropian.

“Ua rikujtojmë palëve që të punojnë së bashku në hapat e ardhshëm për zbatimin e Marrëveshjes së arritur ndërmjet Kosovës dhe Serbisë në shkurt dhe mars të këtij viti, duke përfshirë edhe Asociacionin e komunave me shumicë serbe, dhe të marrin pjesë në mënyrë konstruktive dhe të sinqertë në takimet e ardhshme të dialogut”, thuhet në deklaratën e shteteve të QUINT-it.