Qeveria nuk tregon si do të veprojë rreth taksës, pasi nuk e hoqi pjesërisht

Qeveria nuk ka treguar për veprimet që do t’i ndërmarrë pas dështimit që të nisë zbatimi i masave të propozuara nga kryeministri Albin Kurti, për taksën ndaj mallrave me origjinë nga Serbia.

KOHA ka pyetur në Zyrën e kryeministrit, por ajo të hënën nuk ka treguar se si do të veprohet tutje.

Për këtë temë kanë refuzuar të flasin edhe nga LDK-ja, e cila kishte kundërshtuar masat e propozuara nga Kurti. Kjo parti ka kërkuar heqjen e menjëhershme të taksës dhe pa kushte, ashtu siç po kërkojnë Shtetet e Bashkuara, raporton KOHA.

Më i zëshmi për heqjen e kësaj mase është emisari i presidentit Donald Trump për dialogun Kosovë-Serbi, Richard Grenell.

Zëdhënësi i tij, Dick Custin, në një përgjigje për KOHËN ka refuzuar të flasë për pasojat me të cilat mund të ballafaqohet Qeveria, por vetëm ka përsëritur kërkesën rreth taksës.

Edhe Arbëri 30 mar 2020 Ekzekutivi nuk jep zotim se do ta heqë taksën në tërësi më 1 prill

“Qëndrimi i Shteteve të Bashkuara mbetet që tarifat duhet të hiqen plotësisht”, ka thënë Custin.

Propozimin e 26 shkurtit, Kurti nuk arriti ta shndërrojë në vendim të Qeverisë, në mungesë të përkrahjes së LDK-së.

Edhe pse vëmendja e shtetit është orientuar drejt ballafaqimit me koronavirusin, njohës të rrethanave thonë se Qeverisë do t’i duhet të marrë vendim rreth kësaj çështjeje.

“Situata e jashtëzakonshme e përballjes me pandeminë botërore mund të krijojë hapësirën për ta lënë anash diskutimin rreth taksës apo dialogun me Serbinë. Por gjithsesi këto çështje janë në tryezën e Qeverisë dhe shtetit të Kosovës, andaj konsensusi i gjerë politik është më se i domosdoshëm”, ka thënë për “Kohën”, Jeta Krasniqi, hulumtuese në KDI.

Edhe Arbëri 18 mar 2020 Qeveria Kurti pa Plan vjetor të punës dhe pa Program legjislativ, kërkohet qeverisje jashtë “karantinës”

Heqja e taksës po kërkohet për ta zhbllokuar dialogun Kosovë-Serbi.

Edhe pse bisedimet ndërmjet dy vendeve, të ndërmjetësuara nga Bashkimi Evropian, janë ndërprerë në nëntor të vitit 2018, këtë fillimvit me ndërmjetësimin e Richard Grenellit, Kosova dhe Serbia nënshkruan marrëveshje përmes së cilës shprehet vullneti për hapjen e linjave ajrore dhe hekurudhore.