Prindërit dhe shkollat fajësohen për veprimet huligane të nxënësve

Rastet e fundit të veprimeve huligane të nxënësve në rrugët e kryeqytetit kanë ngritur shqetësime për rolin e institucioneve arsimore në formimin e tyre. Ndërsa disa fajësojnë sistemin arsimor për mungesën e disiplinës dhe edukimit të mirëfilltë, të tjerë theksojnë se prindërit kanë detyrën kryesore për të ndjekur dhe drejtuar sjelljen e fëmijëve jashtë orarit të mësimit.

Veprime huligane të nxënësve janë kapur nga kamerat e veturave në lagjen “Bregu i Diellit”.

Një grup i nxënësve shihen duke i gjuajtur me gurë veturat në rrugën “Enver Maloku”, e disa duke qëndruar në mes të rrugës për t’i bllokuar automjetet.

Për ish-zëvendësministrin e Arsimit, Xhavit Rexhaj, veprimet e tilla tregojnë për dështim të sistemit arsimor në vend.

Sipas tij, për veprimet e nxënësve ka përgjegjësi shkolla edhe jashtë rrethojave të institucionit arsimor.

“Në kohën e sotme të zhvillimit kaq të shpejtë të teknologjisë, prindi nuk mund të gjendet në edukimin e fëmijës, as në përcjelljen e trendëve sociale, shoqërim, abuzimi me substanca, shoqëria e keqe, ndikimi i mjeteve teknologjike, televizioni, emocionet e të tjera, prandaj në këtë kuptim duhet të vihet në pyetje shkolla. Tash askush tjetër në Kosovë nuk mundet me ndikuar në edukimin e mirëfilltë edhe këto bullizmi e dhuna që ndodhin janë probleme të mosfunksionimit të sistemit shkollor”, ka theksuar Rexhaj.

Edhe Arbëri 18 kor 2026 Ekspertët i vlerësojnë të pamjaftueshëm “oficerët e sigurisë” në shkolla

Por me këtë nuk pajtohen institucionet arsimore.

Sipas drejtoreshës së shkollës “Ismail Qemali” në kryeqytetet, Mimoza Krasniqi, prindërit janë përgjegjës për sjelljet e tilla të nxënësve.

“Përgjegjësia i bie prindërve që fëmijët e tyre të drejtohen drejt e në shtëpi se kur përfundon orari mësimor ata duhet të shkojnë në shtëpi dhe jo të mbetën rrugëve dhe të bëjnë dëme të cilat nuk i takojnë”, ka deklaruar Krasniqi.

Sipas saj, të gjitha rastet që raportohen në shkollë trajtohen nga menaxhmenti në bashkëpunim me mekanizmat e tjerë institucionalë. 

Edhe Arbëri 15 shk 2026 Më 2025, dyfishim të dhunës në shkolla dhe rreth tyre

“Rastet të cilat raportohen pa marrë parasysh a janë brenda shkollës a jashtë shkollës ne jemi në bashkëpunim me prindërit, me policinë ose me kalimtarët e rastit të cilët i shohin e na tregojnë video, ne mundohemi me çdo kusht me i trajtuar duke u koordinuar me psikologen e pedagogen e shkollës”, ka thënë Krasniqi.

Polica në kryeqytet ka thënë se rasti i të mërkurës nuk është raportuar në këtë institucion.
E sipas të dhënave që ka ofruar Policia, vitin e kaluar janë shënuar mbi 400 incidente në shkolla dhe përreth tyre dhe janë konfiskuar mbi 70 armë të zjarrit dhe të ftohta.