Presidentja u bën thirrje shqiptarëve të Luginës që masivisht të votojnë për koalicionin shqiptar

Presidentja e Kosovës, Justina Shiroka-Pula, u ka dërguar mesazh shqiptarëve të Luginës së Preshevës për zgjedhjet që do të mbahen të dielën në Serbi. 

Ajo u ka bërë thirrje shqiptarëve të Preshevës, Medvegjës dhe Bujanocit që jetojnë në Kosovë që më 25 tetor të marrin pjesë “sa më masivisht” në zgjedhjet parlamentare atje. 

“Shfrytëzojeni të drejtën tuaj demokratike të votës për mbrojtjen dhe avancimin e të drejtave të shqiptarëve”, thuhet në mesazhin e saj.

Presidentja ka theksuar se pjesëmarrja në votim kontribuon në përfaqësim politik dhe përmirësim të pozitës së shqiptarëve në Luginë. 

“Bashkimi është çelësi i përfaqësimit më të fuqishëm politik. Prandaj, bashkë në listë dhe bashkë në votim. Për më shumë deputetë shqiptarë në Parlamentin e Serbisë.  Për një zë më të fuqishëm në mbrojtje të të drejtave, dinjitetit dhe interesave të shqiptarëve. Çdo votë ka rëndësi. Pjesëmarrja juaj është kontribut i drejtpërdrejtë për përfaqësimin politik dhe për përmirësimin e pozitës së shqiptarëve në Preshevë, Medvegjë dhe Bujanoc. Të bashkuar në përfaqësim, më të fuqishëm në mbrojtjen e të drejtave tuaja!” ka thënë ajo.

Partitë politike shqiptare të Luginës do të garojnë në një listë të përbashkët për zgjedhjet e 25 tetorit në Serbi. “Koalicioni Shqiptar” u quajt lista e përbashkët e tyre. Bashkimi i të gjitha partive politike shqiptare në Luginë, kurdo që ka ndodhur, është përkthyer në rezultat më të mirë zgjedhor, dhe përfaqësim më të madh në numër në Kuvendin me 250 ulëse të Serbisë. Por, kur nuk ishin bashkë, i vetmi që zakonisht i përfaqësonte viteve të fundit ishte Shaip Kamberi.

Edhe Arbëri 21 tet 2026 “Vatra“ alarmon për largimin e shqiptarëve nga listat e votuesve të Serbisë

Për herë të parë, në vitin 2020, u bënë bashkë të gjitha partitë shqiptare të Luginës së Preshevës dhe garuan në një listë të vetme. Ishte hera e parë gjithashtu që u siguruan tri ulëse nga shqiptarët në Parlamentin e Serbisë.