Prej frikës nga koronavirusi, pejanët iu rrinë larg objekteve shëndetësore

Në Qendrën Kryesore të Mjekësisë Familjare në Pejë, por edhe në qendrat tjera të mjekësisë familjare dhe ambulanca, ditëve të fundit ka rënë në mënyrë drastike numri i pacientëve.

Këtë rënie e ka konfirmuar të premten për Kohën Ditorë, drejtori i Shëndetësisë, Petrit Loci.

“Frika nga koronavirusi po e bënë të vetën dhe pacientët nuk po shkojnë në QKMF dhe objektet tjera të shëndetit primar, në të cilat numri i pacientëve ka rënë shumë”, ka thënë Loci, raporton KOHA.

Sipas tij, numri i pakët i pacientëve në këto objekte të shëndetit primar, ka ndikuar edhe në rënien e numrit të infektuar me gripin sezonal.

“Pacientët nuk po shkojnë të mjeku. Po rrinë në shtëpi. Njerëzit nuk po i frekuentojnë qendrat mjekësore për shkak të frikës që e kanë nga koronavirusi. Nuk ka ndodh në histori të QKMF-së e as në kohën më parë kur ka funksionuar ky objekt si dispanseri, që ka pas kaq pak në numër të pacientëve. Sidomos numri i pacientëve fëmijë në pediatri ka qenë jashtëzakonisht i ulët”, thotë Loci.

E frika nga koronavirusi, siç thotë Loci, ka vetëdijesuar në një far forme qytetarët që të mos shkojnë edhe pa nevojë në ambulanca, sikur që e kanë pas zakon të shkojnë.

“Kjo është edhe me mirë që nuk po shkojnë. Është një lloj vetëdijesimi i popullatës, edhe pse e kanë nga frika prej koronavirusit. Më mirë është në shtëpi të qëndrojnë e më sigurt”, thotë Loci.

Numri i pacientëve sikur në qendrat e mjekësisë familjare nuk ka rënë edhe në Spitalin e Përgjithshëm në Pejë, por as nuk është rritur. Zëdhënësi i këtij spitali, Naim Sahiti, tregon se numri i pacientëve është i njëjtë sikur ditët e mëparshme, por edhe në spital, siç thotë ai, ka rënë në masë të madhe numri i vizitoreve, të cilët edhe kanë bërë zakonisht tollovinë në spital.

Kjo rënie ditëve të fundit gjithashtu ka të bëjë me frikën e qytetarëve nga koronavirusi.