Shumë miq, familjarë e kolegë i kanë dhënë lamtumirën e fundit zyrtarit policor Halit Zhdrella, 58-vjeçar, nga fshati Penuh i Podujevës, i cili ka mbetur i vrarë si pasojë e plagëve të marra mbrëmjen e së dielës, kur është plagosur nga një armë gjuetie.
Kohavisioni ka mësuar se incidenti ka ndodhur mes të ndjerit dhe nipit të tij gjatë pastrimit të armës.
Familjarët e viktimës nuk kanë pranuar të flasin para kamerave, por kanë thënë se rasti ka ndodhur aksidentalisht në shtëpinë e të ndjerit, raporton KTV.
Ata kanë deklaruar se e tëra është sqaruar në raportin e policisë, dhe nuk mund të shtojnë asgjë për shkak të ndjeshmërisë së rastit.
“Kohavisioni” ka mësuar se në momentin e incidentit në shtëpinë e të ndjerit, përveç të dyshuarit, ka qenë edhe djali i tij.
Në Policinë e Kosovës, rastin e kanë cilësuar si “vrasje nga pakujdesia”.
Kolegë të tij kanë thënë se bashkëndjejnë me familjen e të ndjerit.
Ndërkaq, i dyshuari T.Zh. 31 vjeç, nipi i të ndjerit, të dielën është arrestuar nga Policia e Kosovës, e më pas është lëshuar nga masa e paraburgimit për të qenë i pranishëm në varrimin e viktimës.
Zyrtari policor, Halit Zhdrella, ishte shef i Krimeve Ekonomike për regjionin e Prishtinës.
