Përfaqësuesit e të burgosurve politikë kërkojnë muze të kujtesës

Kryeministri i Kosovës, Ramush Haradinaj, është takuar sot me përfaqësuesit e Shoqatës së të burgosurve politikë të prirë nga Hydajet Hyseni dhe Meriman Braha.

Në një njoftim të kryeministrisë thuhet se “përfaqësuesit e shoqatës së të burgosurve politikë e kanë falënderuar Haradinajn për kujdesin e dëshmuar dhe të vazhdueshëm për këtë kategori të shoqërisë”.

Në anën tjetër, Haradinaj ka thënë se të burgosurit politikë të Kosovës janë brezi më i persekutuar i popullit të Kosovës, të cilët përgjatë tërë shekullit 20 e mbajtën të gjallë – me fuqinë e mendjes dhe trupit - idenë e lirisë së Kosovës.

“Ata ishin refuzuesit e shtypjes, frymëzuesit dhe kontribuuesit më të mëdhenj të lirisë së Kosovës”, ka thënë Haradinaj.

Përfaqësuesit e të burgosurve politikë diskutuan me Haradinajn për ligjin për të burgosurit politikë, për realizimin e një projekti muzeor të kujtesës, ku do të ekspozoheshin emrat dhe fotografi të burgosurish, dokumente e letra dhe mjetet e torturës mbi ta.

Pastaj ata parashtruan kërkesat, që të krijohet Instituti i dokumentimit dhe që të bëhen përgatitje për shënimin e 50-vjetorit të demonstratave të vitit 1968, vitin e ardhshëm.