Për shkak të mungesës së planit hapësinor në “Bjeshkët e Nemuna”, s’legalizohen mijëra objekte

Mijëra objekte të ndërtuara në 14 fshatrat e trevës së Rugovës pa leje e pa pëlqim apo kushte ndërtimi nuk parashihen të legalizohen me Ligjin aktual të legalizimit.

Kjo për shkak se ende mungon plani hapësinor për parkun kombëtar “Bjeshkët e Nemuna”, brenda të cilit gjendet Rugova prej vitit 2012, kur është miratuar Ligji për këtë park, raporton KOHA.

Pa këtë plan nuk mund të aplikohet as për leje ndërtimi e as për legalizim të ndërtimeve pa leje, pavarësisht se, siç tregojnë në Komunë, ka interesim të qytetarëve që të pajisen me leje ndërtimi.

Mungesa e planit hapësinor ka ndikuar që rugovasit, që nga shpallja e parkut, të mos përfitojnë as grande që ndan Qeveria e Kosovës për mbështetje të zhvillimit, ngase edhe nëse ju ndahet, ata e humbin për shkak se nuk ju lëshohet leja e ndërtimit.

Draft-plani hapësinor është hartuar në vitet 2013-2014 nga Instituti për Planifikim Hapësinor, dhe prej vitit 2014 e deri më sot ky draft-dokument me rëndësi jetike për trevën e Rugovës nuk është miratuar. Shkak për të ka qenë edhe demarkacioni me Malin e Zi.

Mungesa e planit e ka izoluar Rugovën dhe asaj ia ka mohuar shumë projekte, për këtë banorët po kërkojnë të largohen nga zona e Parkut Kombëtar, kundër të cilit kanë qenë që nga fillimi.