Për cilat vepra të vitit 2015 akuzohet deputeti Fisnik Ismaili

Hedhje të aktakuzës ka kërkuar mbrojtja e deputetit Fisnik Ismaili, të mërkurën në Gjykatën Themelore të Prishtinës, raporton KTV.

Prokuroria e akuzon deputetin për ngjarjet e 2015-s, që lidhen me gjuajtje gazi lotsjellës dhe pengim të personit zyrtar.

Vepra e fundit penale ka të bëjë me këtë arrestim të Albin Kurtit në nëntor të 2015-s, e që, sipas Prokurorisë, Ismaili e pengoi Policinë që të kryejë detyrën e saj.

Atë kohë, bashkë me deputetët e tjerë të “Vetëvendosjes”, në krah të Kurtit ishte edhe, tani kryeministër i Kosovës, Ramush Haradinaj, i cili kundërshtonte demarkacionin dhe Asociacionin e komunave me shumicë serbe.

Por, avokati i Ismailit thotë se me këto veprime nuk vërtetohet se ai ka penguar Policinë që të arrestojë Albin Kurtin. Për posedimin e dy bombolave të gazit, mbrojtja konsideron se nuk ka prova të mjaftueshme, sepse vërtetimi mbi marrjen e përkohshme të gjësendeve nuk është i vlefshëm.

Gjykata do të vendosë për kërkesat dhe nëse nuk e hedh poshtë aktakuzën, atëherë rasti do të shkojë në gjykim kryesor.