Parafillorët edhe sivjet jashtë skemës së subvencionimit për libra të shkollimit të detyrueshëm

Ndonëse arsimi parafillor është bërë i detyrueshëm që nga gushti i 2023-tës, fëmijët e këtij niveli nuk janë përfshirë as sivjet në skemën e subvencionimit për libra. Për sigurimin e teksteve shkollore, prindërit detyrohen të paguajnë nga 20 deri në 25 euro, megjithëse Kushtetuta parasheh që shkollimi i detyrueshëm të financohet nga fondet publike

Edhe këtë vit shkollor, fëmijët që e nisin parafillorin kanë mbetur jashtë skemës për subvencionim të librave, megjithëse arsimimi në këtë nivel është bërë i detyrueshëm që prej 1 gushtit të 2023-tës.

Për t’ua mundësuar fëmijëve ndjekjen e mësimeve në klasën parashkollore, prindërit detyrohen t’i shpenzojnë 20 deri në 25 euro për tekste shkollore, ani se Kushtetuta parashikon që shkollimi i detyrueshëm të financohet nga fondet publike.

Juristi Anton Ndrecaj ka thënë se mospërfshirja në subvencionim edhe e fëmijëve të nivelit parafillor përbën diskriminim dhe shkelje.

“Nuk do të duhej të diskriminoheshin edhe fëmijët parashkollor, për shkak se vetë konteksti i ligjit thotë në ngritjen e nivelit të cilësisë së edukimit, si mund të ngritjesh nivelin e cilësisë së edukimit përderisa që në fillim bën diskriminim për fëmijët parashkollor. Ka shkelje të vendimit të qeverisë për të mos i subvencionuar pjesën për ofrimin e teksteve parashkollor për fëmijët të cilët vijojnë nivelin parafillor”, ka deklaruar Ndrecaj.

Për këtë çështje, ankesa nga prindërit janë shprehur në Këshillin e Prindërve.

Ankesë ka edhe nënkryetarja e këtij Këshilli, Linda Dula-Halilabazi, e cila ka thënë se prindërit janë detyruar që kësisoj ta bartin vetë barrën financiare për sigurimin e librave.

“Për prindërit është shumë barrë, sepse nëse niveli është i obligueshëm, ka familje që vendosin që të mos i dërgojnë fëmijët në parashkollor për rrethana familjare. Tash nëse bëhet i obligueshëm, plus duhet edhe të subvencionohen dhe përkrahen me tekste shkollore aq sa mund të kushtojnë është mjaftueshëm barrë për të. Ka familje që ndoshta as për ato libra nuk kanë mjete”, ka thënë ajo.

Të pyetur nga KOHA lidhur me mossubvencionimin e nxënësve parafillorë, në Ministrinë e Arsimit nuk kanë kthyer përgjigje.

Përveç nivelit parafillor, shkollim i obligueshëm është edhe niveli fillor dhe ai i mesëm i ulët.

Tekstet shkollore për nxënësit e këtyre dy niveleve janë siguruar nga shteti që nga viti 2008, ndërsa prej dy vjetësh prindërit janë subvencionuar nga Ministria e Arsimit për blerjen e tyre.