Pandemia ndërpret punimet në sheshin e Pejës, ishte planifikuar të përfundonte këtë muaj

Këtë muaj është dashur që të përfundonin punimet e fazës së parë të projektit për ndërtimin e sheshit të qytetit të Pejës, që parasheh rindërtimin e pjesës qendrore të sheshit “Skënderbeu” deri te rruga që shkon për në Qendrën Kryesore të Mjekësisë Familjare dhe shtrimin e tij me kalldrëm italian.

Mirëpo ende nuk është shtruar as edhe një gur kalldrëmi, ndonëse qe dhjetë ditë me masat lehtësuese të Qeverisë janë lejuar edhe punimet ndërtimore.

Vazhdimi i punimeve në këtë shesh ka mbetur pengë e pandemisë, e cila po ia pamundëson punëkryerësit nga Gjermania për t’i vazhduar punimet.

“Punëkryerësi ka ekipin e punëtorëve për të vendosur kalldrëmin, të cilët duhet të vijnë prej Gjermanisë. Janë dy ekipe nga tre veta. Kanë pasë me ardhë para pandemisë, por me ndalimin e fluturimeve nuk kanë mundur. Pritet që kur të hapet mundësia e qarkullimit, pra prej Gjermanisë me ardhë këto dy ekipet me vazhdua punimet”, ka thënë për KOHËN, kryetari i Pejës, Gazmend Muhaxheri.

Kalldrëmi i sjellë nga Italia është i pamjaftueshëm për ta mbuluar tërë hapësirën qendrore të sheshit “Skënderbeu”. Pjesa tjetër pritet të vijë pas përfundimit të pandemisë.

Për fazën e parë të projektit që kap vlerën e 519 mijë eurove, tashmë të gjitha mjetet janë siguruar thotë drejtori i Financave, Jeton Abazaj.

Megjithatë, shtrimi i sheshit prej shtatores “Nëna Terezë” e deri në krye të korzos nuk është planifikuar të punohet, për shkak edhe të disa ndërtimeve në prona private anën e djathtë të korozos.

“Në pjesën mbrapa meje nuk është planifikuar që të fillojnë punimet sivjet, as financiarisht e as si projekt. Kjo do të planifikohet vitin e ardhshëm. Për arsye se do të ketë punime, por edhe se nuk janë të përfunduara të gjitha procedurat e shpronësimeve dhe këmbimeve të mundshme”, ka thënë drejtori i Financave në këtë komunë, Jeton Abazaj.

I tërë sheshi i qytetit të Pejës është rindërtuar herën e fundit në vitin 2011 me projektin në vlerë prej 300 mijë eurosh të bashkëfinancuar nga Ministria e Administrimit të Pushtetit Lokal, UN HABITAT-it dhe organizatës suedeze SIDA.

Mirëpo, pllakat e mermerta me trashësi prej 3 centimetrash, të destinuara vetëm për këmbësorë, janë dëmtuar pas një kohe të shkurtër prej frekuentimit të vazhdueshëm të automjeteve në shesh.