Osmani ndan urdhrin “Hero i Kosovës” për policin që u vra në Banjskë

Presidentja e Kosovës, Vjosa Osmani i ka ndarë urdhrin “Heroi i Kosovës” postmortem policit Afrim Bunjaku, për të cilin tha se ra në mbrojtje të dinjitetit të Republikës së Kosovës në sulmet e fundit fshatin Banjskë në Zveçan.

Sipas saj, Afrimi ka qëndruar si mbrojtës i paepur i lirisë.

“Sot nderojmë një rreshter policie trim dhe vetëmohues që sakrifikoi jetën për mbrojtjen e qytetarëve tanë. Afrim Bunjaku dhe anëtarë të tjerë të policisë u sfiduan nga banda kriminale. Heroi ynë Afrimi ishte një shtyllë e fuqishme e Policisë së Kosovës. Ishte shërbyes i devotshëm i atdheut. Qëndroi i palëkundur në mbrojtje të ligjit e kundër grupeve terroriste të mbështetura nga Serbia, qellmi i së cilëve ishte trazimi jo vetëm i Kosovës por edhe i rajonit”, ka thënë ajo.

Osmani ka thënë se beteja e vendosjes së rendit dhe ligjit është një nga sfidat më të mëdha në çdo shoqëri.

Ka shtuar se trashëgimia e tij duhet të shërbejë si kujtesë se heronjtë janë gjithmonë në mesin e qytetarëve të vendit.

Osmani ka thënë se polici Afrim Bunjaku e vendosi interesin e Republikës përpara fatit individual.