Opozita në Lipjan kërkon më shumë lapidarë për dëshmorët e UÇK-së

Rishikimi i buxhetit të Komunës së Lipjanit për disa projekte kapitale ka nxitur akuza nga opozita drejt udhëheqësve të Komunës.

Në seancën e jashtëzakonshme debati është tensionuar pasi Ekzekutivi i Komunës ka planifikuar t’i ndërtojë vetëm dy lapidarë për dëshmorët e UÇK-së.

Me një gjë të tillë nuk është pajtuar Ramiz Qeriqi, veteran dhe asamblist nga radhët e AAK-së, raporton KOHA.

Përfshirjen në rishikim të buxhetit edhe të projekteve të tjera për ndërtimin e lapidarëve e ka kërkuar edhe PDK-ja, por propozimet nuk janë marrë parasysh.

Kryetari i Komunës së Lipjanit, Imri Ahmeti, ka thënë se është vështirë të realizohen të gjitha projektet kapitale të planifikuara për shkak të kufizimeve buxhetore.
Sipas tij, është shumë e vështirë për komunën të bëjë përzgjedhje për ndërtimin e lapidarëve të dëshmorëve pasi që të gjithë e meritojnë atë.

Buxheti i Komunë së Lipjanit për këtë vit është planifikuar të jetë rreth 18 milionë euro në të gjitha kategoritë e shpenzimeve.