Me shumë vëmendje, ambasadori britanik Ruari O’Conell po e dëgjon Avni Melenicën, njërin nga të mbijetuarit e masakrës së 22 majit në Vushtrri.
Teksa po ecin bashkë rrugës ku forcat serbe para 20 vjetëve, banorët e këtij qyteti i kishin larguar me dhunë nga shtëpitë e tyre, Melenica po i rrëfen ambasadorit tmerrin e asaj dite, raporton KTV.
Bashkë edhe me familjarë tjerë të viktimave, po ndalen te rruga që mban emrin në nderim të tyre.
Kujtimet e 22 majit të 1999-s, rikthehen kur e shohin shtëpinë në të cilën burra, gra e fëmijë ishin masakruar.
Kjo ditë kishte qenë e kobshme për motrat Shatrolli, të cilat mbetën pa vëlla.
Dhimbja dhe malli për dy fëmijët e tij e kanë rënduar më shumë se mosha, 77-vjeçarin Hasan Shkreli.
Vajzën 18-vjeçare dhe djalin 15-vjeçar, serbët ia morën nga duart, e 20 vjet pas, trupi i 18-vjeçares ende nuk është gjetur.
Edhe
Me rastin e 20 vjetorit, përkujtohen 74 shqiptarët e vrarë në Masakrën e Vushtrrisë
Ambasadori britanik u tha familjarëve se lufta nuk duhet harruar, derisa i porositi se
pajtimi fillon duke treguar dhe dëgjuar të vërtetën.
Më 22 maj të vitit 1999, në Vushtrri, 68 shqiptarë, pasi u dëbuan nga shtëpitë e tyre, u pushkatuan nga forcat serbe.
