-
Nga:
Arianita Hoti
- 1 shkurt 2026 19:22
- Shpërndaje në:
Diplomë bachelor në Infermieri të Përgjithshme është kërkuar në konkursin e Shërbimit Spitalor Klinik dhe Universitar të Kosovës për pozitën defektolog në Klinikën e Otorinolaringologjisë. Për këtë vend pune kanë aplikuar vetëm dy kandidatë. Nga Departamenti i Infermierisë në Universitetin e Prishtinës thonë se të diplomuarit në infermieri nuk janë të kualifikuar për ta ushtruar punën e defektologut, pasi kjo pozitë kërkon arsimim specifik
Në konkursin e hapur nga Shërbimi Spitalor Klinik dhe Universitar i Kosovës për pozitën defektolog në Klinikën e Otorinolaringologjisë, si kriter tek arsimimi kërkohet vetëm diploma bachelor në Infermieri të Përgjithshme.
Në këtë konkurs kanë aplikuar dy kandidatë.
Më 16 janar, me publikimin e listës së aplikuesve, në dokument figuron pozita “Mjek specialist i Otorinolaringologjisë”.
Më pas, me një publikim tjetër më 21 janar, ky gabim është përmirësuar dhe është rikthyer sërish emërtimi defektolog.
Defektologu është profesionist i fushës së edukimit special, merret me vlerësimin dhe trajtimin e çrregullimeve të të folurit, dëgjimit dhe zhvillimit intelektual, si dhe me mbështetjen e fëmijëve me autizëm apo vonesa zhvillimore.
Por Besarta Pelaj, shefe e Departamentit të Infermierisë në Universitetin e Prishtinës, ka thënë se studentët e infermierisë nuk ndjekin program që përfshin përgatitje në fushën e defektologjisë.
“Kurrikula e këtij programi nuk përfshin lëndë apo module të specializuara në fushën e defektologjisë, logopedisë apo terapisë së të folurit dhe gjuhës. Në lënden Komunikimi në shëndetësi, dhe sipas kurrikulës, elementet e komunikimit që trajtohen tek studimet infermierore kanë karakter të përgjithshëm profesional dhe etik, dhe shërbejnë për përmirësimin e komunikimit klinik me pacientin, jo për vlerësim apo terapi të specializuar të çrregullimeve të komunikimit”, ka thënë Pelaj.
Sipas saj, infermierët nuk janë të kualifikuar për të kryer punën e defektologut.
“Diploma Bachelor e Infermierisë përgatit profesionistë për ushtrimin e profesionit të infermierit dhe nuk mund të konsiderohet diplomë ekuivalente apo zëvendësuese për profile profesionale si, defektologjinë. Në këtë kuadër, infermierët nuk përgatiten për ushtrimin e shërbimeve të specializuara në fushën e çrregullimeve të folurit dhe gjuhës, të cilat, sipas praktikave profesionale dhe standardeve ndërkombëtare, kërkojnë arsimim universitar specifik dhe kompetenca të veçanta profesionale”, ka thënë ajo.
Programi i defektologjisë aktualisht nuk ofrohet në asnjë institucion akademik në Kosovë, as në Universitetin e Prishtinës dhe as në ndonjë universitet privat.
Për këtë konkurs ka pasur reagime edhe nga “ZË- Asociacioni i Logopedëve të Kosovës”, të cilët atë e kanë cilësuar si të papërshtatshëm.
Lekë Gjurgjialin, drejtor i këtij asociacioni, ka thënë se edhe vetë termi “defektolog” nuk përdoret më në shumicën e vendeve të zhvilluara perëndimore.
“Termi ‘Defektolog’ është larguar nga përdorimi në thuajse të gjitha shtetet e zhvilluara perëndimore së paku para 20 viteve. ‘Defektologjia’ si degë studimi e ‘Defektologu’ si profesion nuk përdoren si terma të tillë për shkak se cilësohen si terminologji stigmatizuese, jo të sakta dhe jogjithëpërfshirëse për komunitetin që e trajtojnë. Një profesion i tillë, fatkeqësisht, akoma ekziston në mesin e profesioneve të rregulluara në Kosovë, edhe pse studimi i këtij profesioni nuk është i mundur në Kosovë ose në asnjë vend të zhvilluar perëndimor”, ka thënë ai.
Sipas tij, shtetet që ende e përdorin këtë term janë Maqedonia e Veriut, Serbia dhe Rusia, ndërsa në literaturë theksohet se përdorimi i tij lidhet kryesisht me vende të influencuara nga ish-Bashkimi Sovjetik.
KOHA që nga e mërkura i ka dërguar pyetje Shërbimit Spitalor Klinik e Universitar të Kosovës për të sqaruar pse për një pozitë të tillë kërkohet vetëm diplomë bachelor në Infermieri të Përgjithshme, por nuk ka marrë përgjigje.