Familja e Burhan Sadriajt nga Ujzi i Gjakovës vazhdon të jetë e mbërthyer nga dhimbja e madhe, pasi mëngjesin e 8 shtatorit në odën e tyre shpërtheu një zjarr i madh, ku si pasojë vdiqën dy fëmijë, njëri 12 dhe tjetri 13-vjeçar. E organet kompetente ende nuk kanë dhënë ndonjë informatë në lidhje me shkaktarin e zjarrit në këtë familje.
"Dhimbja vazhdon të jetë e madhe, nuk di njeriu qysh me e përshkru këtë dhimbje", ka thënë të premten për KOHËN, Naim Sadriaj, xhaxhai i dy viktimave.
Ai ka treguar se është detyruar ta shembë shtëpinë-gërmadhë që kishte mbetur nga zjarri, për të fashitur sadopak dhimbjen që zgjonte pamja e rëndë te familjarët.
"U detyruam ta shembim dhe ta pastrojmë vendin, sepse familjarët tërë kohën ngjiteshin lart dhe e shikonin vendin ku ishin djegur fëmijët dhe mërziteshin shumë", ka thënë Sadriaj. E kanë nxjerrë edhe shtyllën elektrike prej drurit, e cila shihej si shkaktare e zjarrit nga familja Sadriaj dhe në vend të saj e kanë vendosur një shtyllë betoni.
Naim Sadriaj përsërit se ajo shtyllë elektrike shihet si e vetmja shkaktare e shpërthimit të zjarrit nga familja e tij.
"Ne dyshimin prej fillimit e deri më sot e kemi se zjarri erdhi prej KEDS-it. I kemi lajmëruar KEDS-in jo një herë, po 2-3 herë, nuk janë përgjigjur, hypshin në shtyllë e këputnin, e lidhnin, se di çka bënin, por nuk ka tjetër shkaktar, me pas qenë dimër kish mujt ndonjë zjarr, por në këtë kohë s'ka tjetër veç rryma", ka thënë Sadriaj.
Familja Sadriaj nuk ka angazhuar avokat rreth rastit, pasi sipas Naim Sadriajt ata po presin fillimisht përgjigjen nga prokuroria, e cila ende nuk ka dhënë ndonjë përgjigje se cili ka qenë shkaktari i zjarrit.
Kryeministri i Qeverisë së Republikës së Kosovës, Albin Kurti, kishte premtuar 40 mijë euro për familjen Sadriaj pas tragjedisë së 8 shtatorit, por sipas Naim Sadriajt ky premtim ende nuk është përmbushur.
"Ka premtuar kryeministri, ndoshta e realizon, por deri tash nuk ka asgjë në xhirollogari", ka thënë Sadriaj.
Edhe në shkollën fillore dhe të mesme të ulët "Pjetër Bogdani" në Demjan, ku fëmijët e Ujzit i ndjekin mësimet, ndihet mungesa e 2 nxënësve që humbën jetën në tragjedinë e 8 shtatorit.
Nazmi Pnishi, drejtor i shkollës, ka thënë të premten për KOHËN se ky fillimviti do të mbahet në mend në historikun e shkollës që drejton për dhimbjen e madhe që kanë përjetuar nxënësit dhe stafi mësimor me mungesën e dy nxënësve nga Ujzi.
"Kjo është humbja më tragjike prej themelimit të shkollës sonë, është e papërshkrueshme, rasti se si ka ndodhur është tepër tragjik", ka thënë ai duke treguar klasat dhe bankat ku duhej të uleshin këtë fillimvit shkollor Oresi dhe Burhani.
KOHA ka kërkuar një përgjigje nga Prokuroria Themelore në Gjakovë në lidhje me ecurinë e hetimeve të deritashme, rreth shkaktarit të zjarrit që mori jetën e 2 fëmijëve në Ujz, por aty është thënë se janë në pritje të raportit të ekspertëve.
"Në vendngjarje, përveç njësiteve të tjera, kanë qenë edhe ekspertët e fushave përkatëse, eksperti i zjarreve dhe eksperti i KEDS-it, të cilët kanë për të përpiluar raportin lidhur me inspektimin dhe shkaktarin e mundshëm të zjarrit. Prokuroria Themelore në Gjakovë nuk mund të japë ndonjë informacion pa pranuar raportin nga ekspertët përgjegjës", ka thënë në një përgjigje të shkruar për KOHËN, Yllka Juniku-Sheu, zyrtare për Informim në Prokurorinë Themelore në Gjakovë.
Legjenda: “Dhimbja vazhdon të jetë e madhe, nuk di njeriu qysh me e përshkru këtë dhimbje”, ka thënë të premten Naim Sadriaj, xhaxhai i dy viktimave