Nuk anulohen kushtet ndërtimore në Badovc, pronari i tokës paralajmëron ankesë në Arbitrazh

Të shumtë janë ata që iu gëzuan vendimit obligues të Ministrisë së Ambientit ndaj Komunës së Prishtinës për anulimin e kushteve të ndërtimore në Badovc.

Por, këto kushte vazhdojnë të mbesin akoma në fuqi.

Ndonëse ka kaluar gati një javë nga publikimi i vendimit të ministrit të Infrastrukturës dhe Ambientit, Lumir Abdixhiku, kryetari i Komunës së Prishtinës, Shpend Ahmeti, thotë se nuk është në dijeni nëse ky vendim ka mbërritur në komunë, raporton emisioni 038 i KTV-së.

Për këtë çështje, komuna apo ministria ose të dyja bashkë do të përballen me padi.

Pronari i hapësirës ku është planifikuar ndërtimi ka paralajmëruar se do të ankohet në Gjykatën Ndërkombëtare të Arbitrazhit për shkelje të të drejtave të njeriut.

Anulimin e mundshëm të kushteve, ai e quan tradhti.

Rahman Haradini, pronar i tokës në Badovc, që bashkë me kompanitë “Kawa Group” dhe “4M Grop” kanë planifikuar ndërtimin e 17 vilave afër liqenit, ka thënë se nuk heq dorë nga ky projekt.

Edhe Arbëri 16 gus 2020 Prishtina anulon kushtet e ndërtimit për lagjen në Badovc

Gjatë shqyrtimit të vendimit për anulim, kryetari Ahmeti ka thënë se do të sigurohen të evitojnë ndonjë gabim.

Kushtet ndërtimore i janë lëshuar pronarit të tokës, Rrahman Haradini më 20 dhjetor 2019, dy vjet pasi ai kishte aplikuar për këto kushte.

Për të nxjerrë këtë vendim, komuna ishte obliguar nga Ministria e Mjedisit dhe Planifikimit Hapësinor, pas dy refuzimeve të para që t’i lëshonte kushtet.