Dy lloje të qukapikëve janë incizuar në Parkun e Gërmisë ditë më parë teksa ushqenin të vegjlit në foletë e tyre.
Fotografi Albert Krasniqi, që ka shkrepur këto pamje të qukapikëve, ka publikuar këto momente në “Gërmia Park Wildlife”, transmeton Koha.net.
Ai ka kapur Qukapikun e Zi, si dhe qukapikun Laroshi i Madh.
Krasniqi ka shkruar se pas një përpjekje të gjatë kanë arritur ta lokalizojnë folenë e Qukapikut të Zi, derisa thekson se kjo është hera e parë që bëhet një video e tillë në Kosovë.
Derisa nuk fsheh entuziazmin që Qukapiku i Zi folenizon dhe rritë të vegjlit e tij në Parkun e Gërmisë.
“Ishte një kënaqësi e veçantë, ku së pari arritëm ta lokalozijmë dhe pastaj ta gjejmë folenë e Qukapikut të Zi (Black Woodpecker, Dryocopus martius). Është hera e parë në vendin tonë që bëhet një video e tillë, së dyti është gëzim i madh që një qukapik mjaft i rrallë në vendin tonë folenizon dhe rritë zogjtë e tij në Parkun e Gërmisë”, ka shkruar ai në Facebook.
Derisa në videon tjetër, po ashtu në Parkun e Gërmisë, ai tregon momentin kur qukapiku Laroshi i Madh u sjell insekte të vegjëlve të tyre në strofull.
