MSh, ASK e ARC arrijnë marrëveshje për raportimin e indikatorëve shëndetësorë

Ministria e Shëndetësisë (MSh), Agjencia e Statistikave të Kosovës (ASK) dhe Agjencia e Regjistrimit Civil (ARC) kanë nënshkruar sot Marrëveshje mirëkuptimi për raportimin e indikatorëve shëndetësorë, bëhet e ditur përmes një komunikate për media.

Marrëveshje është nënshkruar nga Dr. Naim Bardiqi, sekretar i Përgjithshëm i MSh-së, Isa Krasniqi, kryeshef Ekzekutiv i ASK-së dhe Bekim Hoxha, drejtor i përgjithshëm i ARC-së.

“Qëllimi i kësaj Marrëveshje është harmonizimi i aktiviteteve dhe nën aktiviteteve për gjenerimin e raporteve për sektorin e shëndetësisë konform rregullave dhe procedurave sipas indikatorëve shëndetësor për nevojat e institucioneve të Republikës së Kosovës, për EUROSTAT, UNECE, OECD dhe institucionet tjera respektive për nxjerrjen e indikatorëve për Objektivat e Zhvillimit te Qëndrueshëm 2030 (SDG) edhe institucionet e tjera”, thuhet në komunikatë.

Marrëveshja parasheh obligimet e secilës palë nënshkruese, ndërsa të dhënat e ofruara nga Ministria e Shëndetësisë/ Instituti Kombëtar i Shëndetësisë Publike të Kosovës dhe Agjencia e Regjistrimit Civil, Agjencia e Statistikave te Kosovës do t’i shfrytëzojë ekskluzivisht për qëllime statistikore, respektivisht për përpilimin e raporteve dhe dërgimin e te dhënave tek institucionet e tjera kombëtare dhe ndërkombëtare.

Bardiqi, duke falënderuar dy institucionet e tjera për nënshkrimin e kësaj marrëveshjeje, tha se ajo do t’u ndihmojë institucioneve që të sigurojnë të dhëna të dëshmuara për indikatorët shëndetësor dhe kjo do të ndikojë që politikat e reja në fushën e shëndetësisë të hartohen duke u bazuar në evidenca të sakta dhe në dëshmi.

Palët nënshkruese janë pajtuar që kjo marrëveshje e mirëkuptimit të fillon të zbatohet nga dita e nënshkrimit.