Ministria e Arsimit lanson platformën e edukimit të hershëm

Ministrja në detyrë e Arsimit, Hykmete Bajrami, gjatë një konference shtypi, të marten, e ka lansuar platformën e edukimit në distancë për parashkollorët.

“Jemi këtu për lansimin e një platforme tjetër për mësimin në distancë. Është kjo platforma e edukimit të hershëm, që do të jetë në dispozicion të të gjithëve”, ka thënë Bajrami.

Ajo ka folur edhe për ecurinë e vijimit në distancë deri më tani. Ka bërë një përmbledhje të punës së ministrisë që nga mbyllja e shkollave, shkaku i pandemisë.

“Si e dini, me 23 mars kemi filluar emetimin e video-xhirimeve për klasat një deri në nëntë. Por, e kemi pasur të pambuluar nivelin parashkollor. Ne sot po e lansojmë këtë platformë dhe u bëjmë thirrje të gjithë prindërve, edukatorëve dhe kujdestarëve ligjorë që ta përdorin këtë platformë”, ka thënë Bajrami.

Platforma që nga nesër është në dispozicion tek e-mësimi.

“Aty ka aktivitete ditore, ka video të ndryshme se si të sillemi me fëmijët në kohën e pandemisë dhe mësimet që duhet t’iu japim atyre”, ka thënë ajo.