Ministri serb: Vuçiqi i shihte me mençuri letrat e kundërshtarit, e dinte kur po bënte blof

Ministri serb i Mbrojtjes, Millosh Vuçeviq ka thënë të shtunën se situata në Kosovë është ende shumë e tensionuar.

Ai ka shtuar se ka shumë pyetje të hapura dhe se shpreson se përgjigjet do të kërkohen në formë të dialogut.

Sipas tij, serbët nuk e dinë hapin e radhës të kryeministrit të Kosovës, Albin Kurti, derisa ka shtuar se presidenti i Serbisë, Aleksandër Vuçiq, i sheh gjatë gjithë kohës letrat e kundërshtarit dhe e kupton se kur po bën blof.

“Serbët janë të shqetësuar sepse nuk dihet se cili do të jetë hapi i radhës i Kurtit, një njeri që ka treguar se nuk merr vendime shumë racionale dhe se nuk është njeri i marrëveshjeve”, ka thënë ai për TV Pink.

Sipas tij, ushtria serbe është e guximshme dhe e vendosur për të përmbushur të gjitha detyrat që i merr nga kreu i shtetit, por ka shtuar se Serbia gjithmonë kërkon që zgjidhja të arrihet me dialog dhe kompromis.