Ministri i Punës dhe Mirëqenies Sociale, Skënder Reçica, nga sot do të drejtojë degën e Nismës Socialdemokrate në Prishtinë.
Reçica, i cili është edhe anëtar Kryesisë në nivel qendror në Nisma Socialdemokrate, ka marrë besimin e Këshillit Drejtues të Nismës në Prishtinë për ta udhëhequr këtë degë deri në zgjedhjet e reja që do të mbahen në këtë degë.
Siç njofton Nisma, kryetari i këtij subjekti, Fatmir Limaj ka thënë se dega e Nismës në Prishtinë ka një potencial të jashtëzakonshëm për ta rritur Nismën në Prishtinë. Ai u shpreh i bindur se ekipi aktual i Nismës do të bëjë punë të madhe në teren.
“Presim nga ju të vazhdoni aktivitetin tuaj dhe ta konsolidoni degën. Ju ftoj që vizionin e Nismës Socialdemokrate ta shtrini në çdo cep të komunës së Prishtinës”, ka thënë ndër të tjera Limaj në mbledhjen e degës së Nismës Socialdemokrate në Prishtinë.
“Ju lus të punoni fort. Ndani detyrat dhe jepni gjithë potencialin tuaj organizativ e të ecim përpara”, ka shtuar Limaj.
E, nga ana e tij, Reçica tha se drejtimi i degës së Nismës në kryeqytet është përgjegjësi e madhe dhe privilegj për të. Nismën në Prishtinë, Reçica tha se e pret shumë punë.
Edhe
Nisma Socialdemokrate zgjedh dy ministri në krye të degës së saj në kryeqytet
“Është një përgjegjësi dhe rezultati do të jetë i përbashkët. Besoj se do ta gjejmë rrugën e përbashkët për të bashkëpunuar. Pres nga secili nga ju që t’i përvishemi punës. Shumë shpejt aktiviteti ynë do të shtrihet në çdo lagje e fshat të Prishtinës”, ka thënë ndër të tjera Reçica në fjalën e tij.
Dega e Nismës në Prishtinë ia ke besuar postin e nënkryetarëve ministrit të Arsimit, Shyqiri Bytyqi dhe ish-deputetit të Kuvendit, Jeton Svirca.
Ndërsa, shefi i Kabinetit të ministrit Bytyqi, Baton Dushi i është besuar posti i Sekretarit të degës së Nismës në kryeqytet.
