Ministri i MPB-së kërkon nga shtetet evropiane të lënë mënjanë kundërshtitë e të rrisin bashkëpunimin policor

Ministri i Punëve të Brendshme, Ekrem Mustafa, po merr pjesë në punimet e “Forumit Rajonal të Ministrive të Brendshme për kundërveprim ndaj korrupsionit të brendshëm”, i cili po mbahet në Sofje të Bullgarisë.

Qëllimi kryesor i Forumit, siç njofton MPB, është zgjerimi i bashkëpunimit operacional në kundërveprim ndaj korrupsionit të brendshëm, si dhe diskutimi i mundësive për më shumë aktivitete të përbashkëta në nivel rajonal sa i përket këtij bashkëpunimi.

Me këtë rast Mustafa, në diskutimin e tij ofroi bashkëpunimin e plotë të MPB-së dhe të gjitha agjencive nën autoritetin e saj, përfshirë edhe Policinë e Kosovës. Ministri u bëri thirrje kolegëve të tij nga vendet e tjera të rajonit të lënë mënjanë çfarëdo kundërshtimi që mund të ekzistojë ndërmjet si rezultat i qëndrimeve politike dhe pikëpamjeve të ndryshme.

“Duke bashkëpunuar në fushën e sigurisë, ne do të jemi më afër njëri-tjetrit edhe në zgjidhjen e mosmarrëveshjeve politike ende të pranishme në Evropën Juglindore”, tha Mustafa.

Ai mori shembull marrëdhëniet e mira ndërmjet Kosovës dhe Bullgarisë, si një frymëzim për bashkëpunim e mundshëm kudo.

Me iniciativën e Bullgarisë, në vitin 2016 u krijua një rrjet për bashkëpunim të zgjeruar rajonal të njësive të sigurisë së brendshme (NERCISU) me pjesëmarrjen e njësive përkatëse të Ministrive të Punëve të Brendshme të disa vendeve ballkanike. Rrjeti funksionon si një platformë për bashkëpunim aktiv rajonal operacional me linjën 24/7 për koordinimin dhe shkëmbimin e informacionit dhe inteligjencës.