Ministri i Jashtëm suedez: Palët t’i zbatojnë marrëveshjet, Kosova ta formojë Asociacionin

Ministri i Jashtëm i Suedisë, Tobias Billstrom, ka thënë se Kosova dhe Serbia duhet t’i zbatojnë marrëveshjet për të cilat janë dakorduar në procesin e dialogut.

Ai ka thënë se Serbia duhet të mos e pengojë anëtarësimin e Kosovës në organizata ndërkombëtare, por edhe Kosova duhet t’i zbatojë zotimet e saj, përfshirë atë për Asociacionin e komunave me shumicë serbe.

“Është mirë që edhe Kosova t’i përmbushë zotimet e saj, që të krijohet Asociacioni i komunave me shumicë serbe ashtu siç është arritur në marrëveshje”, ka theksuar Billstrom, në një konferencë të përbashkët për media me ministren e Jashtme të Kosovës, Donika Gërvalla, të cilën e kanë mbajtur pas takimit që e kanë zhvilluar të enjten.

Ai ka theksuar se Suedia e mbështet dialogun dhe punë që e kanë bërë në këtë proces Përfaqësuesi i lartë i Bashkimit Evropian për Politikë të Jashtme dhe Siguri, Josep Borrel, dhe i dërguari i BE-së për dialogun mes Kosovës dhe Serbisë Miroslav Lajçak.

Billstrom ka thënë se e ka përshëndetur Marrëveshjen e arritur në Ohër dhe se ajo do të lehtësojë situatën ne veri të Kosovës.

Ai ka theksuar se besojnë që kjo marrëveshje do dërgojë në një relaksim të marrëdhënieve në mes të Beogradit dhe Prishtinës.

“Unë mendoj që të dy palët që e kanë nënshkruar marrëveshjen në Ohër duhet t’i zbatojnë zotimet, dhe kam qenë shumë i qartë edhe në Beograd se duhet ta bëjnë pjesën e punës së tyre e poashtu edhe në Prishtinë që nëse zotoheni për një marrëveshje natyrisht që duhet ta përmbushni”, ka deklaruar ministri suedez.

Ndërsa ministrja Gërvalla në këtë konferencë ka thënë se me homologun e saj suedez kanë diskutuar rreth zhvillimit të Kosovës si dhe për procesin e anëtarësimit në Këshillin e Evropës.

“Janë kryer disa prej procedurave të rëndësishme dhe ndërkohë pritet që në një kohë jo të largët kërkesa jonë pritet të kalojë nga Këshilli i Ministrave. Ne jemi të gatshëm për të plotësuar të gjitha kushtet dhe kërkojmë një anëtarësim meritor. Diskutuam edhe për kërkesën që Kosova ka dorëzuar për anëtarësim në BE. Kemi bërë hapin e parë dhe prandaj falënderojmë shumë presidencën suedeze për mënyrën se si e ka trajtuar këtë proces”, ka deklaruar Gërvalla.

Ajo ka thënë se kanë diskutuar edhe për kosovarët që jetojnë në Suedi.

“Ne mendojmë që mërgata jonë në Suedi është ura më e mirë që e lidhë Suedinë dhe Kosovën. Diskutuam konkretisht edhe për bashkëpunimin në të ardhmen”, është shprehur Gërvalla.